Դասագիրքը կացնի հարւած է մեր հազարամեայ պատմութեան արմատներին
Հայոց պատմութիւնը վերափոխել ու Հայաստանի պատմութիւն դարձնելու փորձը եւս մէկ ապացոյց է, որ Հայաստանի ներկայիս իշխանութիւնը Թուրքիայի եւ Ադրբեջանի հետ վերստին բարեկամանալ է փորձում, եւ այս ամէնը նրանց պահանջները իրականութիւն դարձնելու եւս մէկ փորձ է, որով կը մերժւի մեր հազարամեայ պատմութիւնը։
Yerkir.am-ը թեմայի շուրջ զրուցել է «Արեւմտահայոց հարցերի ուսումնասիրութեան կենտրոն»-ի տնօրէն, հայագէտ Հայկազուն Ալւրցեանի հետ:
– Պարո՛ն Ալւրցեան, ո՞ւր կը տանի վերոնշեալ որոշումը։
– Այդ որոշմամբ կը խեղաթիւրւի Հայոց պատմութիւնը։ Այս դասագիրքը կացնի հարւած է մեր հազարամեայ պատմութեան արմատներին, որովհետեւ վերոնշեալ դասագիրքն ամէն նախադրեալ ստեղծում է հետագայում բազմաթիւ պատմական կարեւորագոյն սկզբունքային հարցերից հրաժարւելու համար, օրինակ՝ հայոց բնիկութեան գաղափարից, որը տւեալ դասագրքում դրւում է հարցականի տակ, մեր մշակութային հնագոյն արժէքներից, Հայ Դատից՝ Արեւմտեան Հայաստանի, Կարսի, Արցախի եւ Նախիջեւանի հայկականութիւնից: Արդէն իսկ պաշտօնական մակարդակում ժխտւում է մեր ազգային հիմնական խորհրդանշանի՝ Արարատ լեռան հայկականութիւնը: Այս ամէնն ուղղակիօրէն ճանապարհ է հարթում Հայոց Ցեղասպանութեան ուրացման համար:
– Ի՞նչ հետեւանքներ կունենայ այս ընթացքը հայ ժողովրդի ապագայի կամ, ինչպէս ընդունւած է ասել, հայկական շարունակականութեան վրայ:
– Թուրքերը Արցախը խլեցին ռազմական ճանապարհով՝ Հայաստանում իշխանութեան բերելով հայ ազգի թշնամի ուժերի: Սակայն նրանց հայաջինջ քաղաքականութեան ճանապարհին դեռ կանգուն է հայ ժողովրդի հզօր պաշտպանական ամրոց՝ հայ ժողովրդի պատմական յիշողութիւնը: Հայոց պատմութեան նենգափոխումով թշնամին ահա այդ ամրոցն է ուզում խորտակել: Իսկ դա անհնար է, քանի դեռ դպրոցում հայ աշակերտները սովորում են ճշմարիտ Հայոց պատմութիւնը: Հայոց պատմութեան նենգափոխմամբ փորձ է արւում մահացու հարւած հասցնել հայ մարդու պատմական յիշողութիւնը՝ նրան վերածելով մանկուրտի:
– Իսկ ի՞նչ կը տայ այդ կործանարար ընթացքին վարչապետի նախաձեռնութիւնը՝ վերանւանել «Հայոց պատմութիւնը»:
– Երբ դասագրքի վերաբերեալ մտաւորականները, հասարակական-քաղաքական գործիչներն արտայայտեցին բացասական վերաբերմունք, իսկ հեղինակաւոր պատմաբանները համոզիչ հիմնաւորումներով փաստեցին դասագիրք յորջորջւած այդ շարադրանք վտանգաւորութիւնը, վարչապետ կոչեցեալը փորձեց պառակտել ձեւաւորւած ժխտողական միասնականութիւնը: Լաւ իմանալով, որ դասագիրքը մերժողները ամէն ինչում հակադրւելու են իր որեւէ առաջարկի, ասպարէզ նետեց «Հայոց պատմութիւնը» «Հայաստանի պատմութիւն» վերանւանելու առաջարկը: Ցաւօք այն ունեցաւ որոշ արդիւնք. շատերը, տրւելով այդ սադրանքին, սկսեցին տւեալ համատեքստում հերքել, նոյնիսկ ծաղրել Հայաստան բառը։ Բարեբախտաբար այն լուրջ հետեւանքներ չունեցաւ:
– Ինչպէ՞ս կարելի է այս ամէնը կանխել:
– Եթէ տւեալ իշխանութեան վարած քաղաքականութիւնը սպառնում է պետութեան գոյութեանը, ապա իշխանութեան փոփոխութեան որեւէ մեթոդ չի բացառւում, քանզի եթէ ազգի գոյութեան ոչնչացման վտանգ կայ, ապա նրա գոյութեան իրաւունքից աւելի բարձր իրաւուք չկայ։
