Եկեղեցին պիտի շարունակի պատմական պատասխանատւութեան գիտակցութեամբ ջանքեր ներդնել յանուն հայրենիքի եւ պետականութեան զօրացման
«ԱԼԻՔ» – Գերագոյն հոգեւոր խորհուրդը յայտարարութիւն է տարածել.
«Տաւուշի մարզից տարածքները Ադրբեջանին միակողմանիօրէն յանձնելու իրողութեան եւ բանակցութիւններում ՀՀ իշխանութիւնների որդեգրած անընդունելի դիրքորոշումների առնչութեամբ Մայր Աթոռ Սուրբ Էջմիածինը վերահաստատում է նախընթաց արտայայտւած իր դիրքորոշումը։
Խիստ վտանգաւոր ենք համարում առանց համապարփակ ու երաշխաւորւած լուծումների Տաւուշի սահմանամերձ շրջանում սահմանազատման ու սահմանագծման անւան ներքոյ իրականացւող գործողութիւնները, որոնք նոր սպառնալիքներ են առաջացնում մեր ժողովրդի համար։ Ստեղծւած կացութիւնն արդարացի ընդվզում է առաջ բերել աշխարհասփիւռ հայութեան եւ, մասնաւորապէս, Տաւուշի սահմանամերձ համայնքների բնակիչների շրջանում՝ պատճառ դառնալով «Տաւուշը յանուն Հայրենիքի» քաղաքացիական շարժման սկզբնաւորման:
Առկայ գոյաբանական մարտահրաւէրներին յանդիման հոգեւոր սպասաւորները, տւեալ դէպքում՝ Տաւուշի թեմի եկեղեցականները՝ թեմակալ առաջնորդի գլխաւորութեամբ, հաւատարիմ իրենց հոգեւոր առաքելութեանն ու կոչմանը, չեն կարող անտարբեր մնալ ու անհաղորդ՝ իրենց խնամքին յանձնւած ժողովրդի անհանգստութիւններին ու կարիքներին:
Մեր ժողովրդի զաւակներին յորդորում ենք արդար մտահոգութիւններն ու անհանգստութիւններն արտայայտել բացառաբար խաղաղ ճանապարհներով եւ դրսեւորել հանդարտութիւն ու զսպւածութիւն՝ զերծ մնալով հակաօրինական գործողութիւններից: Հասարակական կարգի պահպանութեան համար պատասխանատու ծառայութիւններից ակնկալում ենք բացառապէս օրէնսդրութեանը խիստ համապատասխան գործելաոճ։
Կոչ ենք անում նաեւ իշխանութիւններին՝ անսալ ժողովրդի հիմնաւոր պահանջներին եւ խաղաղութեանն ուղղւած գործընթացներում առաջնորդւել այնպիսի մօտեցումներով, որոնք չեն մեծացնի անվտանգային սպառնալիքները՝ խորացնելով մեր հանրութեան մէջ անպաշտպանւածութեան եւ անորոշութեան զգացումները: Կարեւորելով սահմանազատման ու սահմանագծման գործընթացները՝ միաժամանակ հաստատում ենք, որ այդ աշխատանքները պէտք է իրականացւեն պատերազմի բացառման, Հայաստանից բռնազաւթւած տարածքների վերադարձման եւ բնակավայրերի անվտանգ ու անխաթար կեանքի ապահովման երաշխիքների առկայութեան պայմաններում։
Ազգային մեր արժանապատւութիւնը, հայրենի պետութեան եւ սրբազան արժէքների հանդէպ նախանձախնդրութիւնն ու հաւատարմութիւնը պէտք չէ տեղի տան անյուսութեան, անհանդուրժողութեան եւ երկչոտութեան, թշնամանքի եւ ատելութեան առջեւ։
Եկեղեցին, չունենալով քաղաքական իշխանութեան յաւակնութիւններ, պիտի շարունակի պատմական պատասխանատւութեան գիտակցութեամբ ջանքեր ներդնել յանուն հայրենիքի եւ պետականութեան զօրացման, մեր ժողովրդի ինքնութեան ու իրաւունքների պաշտպանութեան, ազգային կեանքում միասնականութեան ու եղբայրասիրութեան ամրապնդման՝ նպաստելով տարածաշրջանում խաղաղութեան հաստատմանն ու ամրապնդմանը։
Մեր աղօթքն է, որ Երկնաւոր Տէրը խաղաղութեան մէջ պահի մեր երկիրը եւ մեր ժողովրդի կեանքից ներս զօրացնի սիրոյ, համերաշխութեան ու միաբանութեան ոգին: Ամէն»,- ասւած է տարածւած յայտարարութիւնում։
