Յակոբ Տէր-Խաչատուրեան. «Հայ Դատի բանակն օրնիբուն պայքարում է Հայաստանի, Արցախի իրաւունքների եւ համահայկական մեր շահերի համար»
«ԱԼԻՔ» – «Մեզ համար Արցախի հարցը ոչ միայն փակւած չէ, այլ վերջին «պատերազմը» պարզապէս ճակատամարտի կորուստ էր»: Այս մասին երէկ՝ մայիսի 25-ին ՀՅԴ Հայ Դատի յանձնախմբերի աշխատանքների հիմնական ուղղութիւնների քննարկման եւ համադրման, ինչպէս նաեւ ըստ անհրաժեշտութեան մարտավարական որոշակի վերանայումներ անելու համար՝ ՀՅԴ Բիւրոյի հրաւիրած Հայ Դատի յանձնախմբերի եւ գրասենեակների խորհրդաժողովի պաշտօնական բացմանն իր ելոյթում ասել է ՀՅԴ Բիւրոյի ներկայացուցիչ Յակոբ Տէր-Խաչատուրեանը:
«Մեր պահանջը յստակ է՝ վերադարձի իրաւունք, միջազգային երաշխիքներ, միջանկեալ կարգավիճակ՝ մինչեւ ճշտւի վերջնական կարգավիճակը: Սա ցնորք չէ, սա երազ չէ, սա իրականութիւն է, որի համար ամէն գնով պէտք է պայքարել, եւ դրա համար Հայ Յեղափոխական Դաշնակցութիւնը որոշել է իր արցախեան կառոյցները պահել, որովհետեւ պէտք է վառ մնայ վերադարձի հասկացողութիւնը եւ իրաւունքի խնդիրը։
Դաշնակցութեան համար յուսահատութիւնը ոչ մի ձեւով ընդունելի երեւոյթ չէ: Բնական է, որ ապրում ենք այնպիսի ճակատագրական օրեր՝ մեր ամենասեւ օրերը պիտի արձանագրենք, բայց մենք կասկած չունենք, որ յաղթելու ենք, ինչպէս մենք յստակօրէն յաղթելու ենք այն ահաւոր պայքարում, որը տեղի է ունենում ՀՀ-ի մէջ ազգային արժէքների դէմ, մեր դաւանած դատի դէմ եւ, առհասարակ, մեր ժողովուրդը մասնատելու՝ բաժան-բաժան անելու դէմ»,- ասել է ՀՅԴ Բիւրոյի ներկայացուցիչը։
Անդրադառնալով Հայ Դատի յանձնախմբերին եւ գրասենեակներին, ՀՅԴ Բիւրոյի ներկայացուցիչն նշել է. «Մենք միշտ հպարտ ենք մեր բանակով, Հայաստանի բանակով, հայրենիքի բանակով, բայց ասել ենք, որ այդ բանակի կողքին կայ երկրորդ՝ Հայ Դատի բանակը, որն օրնիբուն պայքարում է Հայաստանի, Արցախի իրաւունքների եւ համահայկական մեր շահերի համար»:
