Հայաստան - Արցախ

ՅԱՆՈՒՆ ՀԱՅՐԵՆԻՔԻ ԲՈՎԱՆԴԱԿՈՒԹԵԱՆ, ԱԶԳԱՅԻՆ ԻՆՔՆՈՒԹԵԱՆ ԵՒ ԱՐԺԷՔՆԵՐԻ

Բազմահազարանոց հանրահաւաք եւ երթ՝ Երեւանում

«ԱԼԻՔ» – Երէկ՝ մայիսի 26-ին Հանրապետութեան հրապարակում տեղի ունեցաւ «Տաւուշը յանուն հայրենիքի» շարժման առաջնորդ Բագրատ Սրբազանի հրաւիրած համազգային հանրահաւաքը, որին մասնակցում էին տասնեակ հազարաւոր քաղաքացիներ:

Մինչեւ հանրահաւաքի սկսելը երիտասարդները Մատենադարանի մօտից երթով միացան հրապարակում հաւաքւած բազմահազար քաղաքացիներին:

Կառավարութեան շէնքի դիմաց վահաններով զինւած բազմաթիւ ոստիկաններ էին բերւել։ Նրանք մի քանի շարքով փակել էին կառավարութեան շէնքի մուտքը։

Հանրահաւաքն սկսւեց զօրակցութեան խօսքերով՝ ուղղւած Տաւուշում եւ Լոռիում բնական աղէտի հետեւանքով տուժածներին։

Բագրատ Սրբազանն, աղօթք բարձրացնելուց առաջ, կոչ արեց մէկ րոպէ լռութեամբ յարգել աղէտի հետեւանքով զոհւած քաղաքացու յիշատակը։

«Այս իշխանութիւնը ոչ միայն յանցաւոր կերպով յանձնում է մեր պետութիւնը՝ իր ֆիզիկական գոյութեամբ, այլեւ աւելի սարսափելին է անում՝ ձգտում է փոխել մեր Հայրենիքի բովանդակութիւնը, ինքնութիւնն ու արժէքները՝ գողանալով եւ ուրանալով մեր խորհրդանիշները, մեր երազներն ու իղձերը, մեր գոյութեան իրաւունքն ու կենսագրութիւնը՝ մոռանալով, որ ոգին յաղթել է «դուխին», Եռագոյնը՝ սեւ ու սպիտակին»,- հանրահաւաքի ժամանակ ասաց Բագրատ Սրբազանը՝ վստահեցնելով, որ չնայած սրան, պայքարը հասնելու է իր նպատակին:

Նա ընդգծեց՝ այս շարժումը հայկական օրակարգ, յստակ նպատակ ունենալու մասին է, կարգապահ ու պատասխանատու քաղաքացիներ ունենալու, դիմակայուն ու անվտանգ, կայուն ու հաստատուն պետութիւն ու խաղաղութիւն ունենալու մասին է։

«Այս շարժումը Աւետեաց երկիր ունենալու մասին է»,- յայտարարեց Բագրատ Սրբազանը՝ այդ նպատակին հասնելու համար վերահաստատելով Նիկոլ Փաշինեանի հրաժարականի պահանջը։

«Այս ճանապարհի խոչընդոտն այսօրւայ իշխանութիւնը, յատկապէս նրա ղեկավարն է, եւ հետեւաբար, նա պէտք է հեռանայ»,- ասաց Սրբազանը։

Հանրաահաւաքին ելոյթ ունեցաւ նաեւ ԵՊՀ արեւելագիտութեան ֆակուլտետի պրոֆեսոր Գուրգէն Մելիքեանը իր ելույթում նշեց, որ ճնշող մեծամասնութեան մօտ, ժողովրդի ու քաղաքական ուժերի մօտ կայ համախոհութիւն, որ շարժման առաջնորդ Բագրատ Սրբազանը պէտք է լինի նաեւ վարչապետ:

Բագրատ Սրբազանն անդրադառնալով անցումային կառավարութեան թեմային, նշեց, որ այդ կառավարութիւնը պէտք է լինի հաշտութեան կառավարութիւնը, պետք է լինի մասնագիտական կարողութիւններով, հմտութիւններով օժտւած, պէտք է լինի հայրենատէր եւ աստւածասէր կառավարութիւն:

Ըստ նրա՝ այդ կառավարութիւնը յստակ պէտք է ունենայ օրակարգային երեք ուղղութիւններ.

«Առաջինը՝ ներքին հաշտութեան օրակարգ՝ հիմնւած արդարութեան եւ արդարադատութեան վրայ։

Երկրորդը՝ արտաքին յարաբերութիւններում պէտք է վարի առանց «հակա»-ների քաղաքականութիւն, ներկայ վիճակի սառեցում անի, որը չափազանց դժւար է, որովհետեւ տեղեկատւութեան անսահամափակ պակաս կայ այս պահին։ Ամէն գնով պէտք է սառեցնել այն իրավիճակը, որում մենք գտնւում ենք։ Պէտք է ձգտի իրական՝ կայուն խաղաղութեան՝ ուժին սպառնալիքի կիրառման վերացմամբ, մեր գերների եւ Արցախի ռազմաքաղաքական ղեկավարութեան վերադարձի իրականացմամբ, խաղաղութեան պայմանագրի շուրջ իրական, խորքային բանակցութիւններ վարելով, ներառեալ՝ արցախցիների անվտանգ վերադարձը՝ անվտանգութեան եւ բոլոր իրաւունքների պաշտպանութեան խնդիրների լուծմամբ։ Սահմանազատման եւ սահմանագծման գործընթացը պէտք է մեկնարկի խաղաղութեան պայմանագրի ստորագրումից յետոյ՝ յստակ քարտէզներով։

Երրորդը՝ պէտք է պատրաստի արտահերթ կամ հերթական ընտրութիւններ՝ ազատ եւ թափանցիկ ընտրութիւնների երաշխաւորը լինելով՝ առանց հաւակնելու մասնակցել այդ ընտրութիւններին»,- ասաց Բագրատ Սրբազանը։

Նա նշեց, որ նկատի ունենալով լայն շրջանակների՝ վարչապետի թեկնածու լինելու առնչութեամբ իրեն առաջադրելը, Վեհափառ Հայրապետի եւ հոգեւոր եղբայների հետ քննարկումների արդիւնքում նշւել է, որ իր հոգեւոր հանգամանքի հետ չի կարող համատեղել վարչապետի թեկնածութիւնը։

Բագրատ Սրբազանը յայտարարեց, որ հաշւի առնելով այդ հանգամանքը, Վեհափառ Հայրապետին խնդրել է իր 30-ամեայ հոգեւոր ծառայութիւնը սառեցնել:

Ապա Բագրատ Սրբազանը կոչ ուղղեց Փաշինեանին․ «Նիկո՛լ Փաշինեան, մենք չենք ուզում, որ քո քաղաքական թիմը բաժանւի եւ պառակտւի, մարդուն տրամադրենք մարդու, հային՝ հայի դէմ՝ արդիւնքում քո թիմը եւ նրա իւրաքանչիւր ներկայացուցչի տանելով քաղաքական, արժէքային եւ բարոյական անդառնալի կործանման՝ ներկայ եւ ապագայ սերունդների նզովքին ենթակայ։ Հրաժարական տուր։ Սա վերջին հնարաւորութիւնն է՝ քաղաքակիրթ ճանապարհով հեռանալու եւ քո վերջին հնարաւորութիւնը, որի համար շատ ժամանակ չունես»։

Հանրահաւաքի աւարտին Սրբազանը առաջարկեց երթով կառավարական ամառանոց գնալ եւ եթէ Փաշինեանը չկատարի հրաժարականի պահանջը, մայիսի 27-ից ժողովրդի կողմից գործողութիւններ են սկսւելու։

«Այս րոպէից ուզում եմ ասել՝ եթէ մեր պահանջները չիրականանան, վաղը՝ առաւօտեան ժամը 08։00-ից, անհնազանդութեան, բողոքի գործողութիւններով, իւրաքանչիւրիս պատասխանատւութեամբ ստիպելու ենք հաշւի նստել ժողովրդի իշխանութեան պահանջի հետ։

Անհնազանդութեան, բողոքի խաղաղ գործողութիւններով ստիպելու ենք ընդունել ժողովրդի պահանջը։ Աշխատանքից ազատելու ենք այն մարդկանց՝ իրենց ղեկավարով հանդերձ, ովքեր մինչեւ այսօր կեղեքել են մեր մտաւոր ու ֆիզիկական կեանքը»,- յայտարարեց Բագրատ Սրբազանը։

Առնչւող Յօդւածներ

Back to top button