Ի՞նչ քայլեր են ձեռնարկւելու՝ Վատիկանի պարբերականում զետեղւած յօդւածին հակազդելու ուղղութեամբ
Լիլիթ Գալստեանը դիմել է ՀՀ կառավարութեանը
«ԱԼԻՔ» – ՀՅԴ Հայաստանի ԳՄ անդամ, ՀՀ ԱԺ «Հայաստան» խմբակցութեան պատգամաւոր Լիլիթ Գալստեանը տեղեկացրել է, որ պաշտօնական նամակով դիմել է ՀՀ կառավարութեանը՝ ակնկալիքով, որ կը ստանայ Արցախում տեղի ունեցող մշակութային ցեղասպանութեան հետ կապւած մի շարք հարցերի պատասխանները:
«Պաշտօնական նամակով դիմել եմ կառավարութեանը՝ ակնկալիքով, որ Արցախում տեղի ունեցող մշակութային ցեղասպանութեան համատեքստում կը ստանամ հետեւեալ հարցերի պատասխանը.
1․Արդեօք ՀՀ կառավարութեան կողմից մշակւել է կոնկրետ քաղաքականութիւն կամ ծրագիր՝ հակազդելու Արցախում հայկական մշակութային հետքի վերացմանն ուղղւած ադրբեջանական քաղաքականութեանը։
2․ Ի՞նչ քայլեր են ձեռնարկւելու դիւանագիտական խողովակով՝ Վատիկանին պատկանող L’Osservatore Romano պարբերականում զետեղւած յօդւածին հակազդելու ուղղութեամբ։
3․ Ի՞նչ քայլեր են ձեռնարկւել եւ առաջիկայում ձեռնարկւելու Արցախի մշակութային ժառանգութեան պահպանութեան եւ պաշտպանութեան ներկայ վիճակն արձանագրող ԻՒՆԵՍԿՕ-ի դիտորդական, փաստահաւաք առաքելութիւն պահանջելու ուղղութեամբ»,- ֆէյսբուքեան իր էջում գրել է նա:
