«Սրբազան պայքար». «Հայաստանը պիտի հետամուտ լինի Արցախի հիմնահարցի՝ բանակցային օրակարգում ներառւելուն»
«ԱԼԻՔ» – «Սրբազան պայքար» շարժումը յայտարարութիւն է տարածել արցախահայութեան՝ հայրենիքի վերադարձի օրակարգի մասին:
«Արցախահայութեան՝ հայրենիք վերադարձի օրակարգ. Արցախի եւ արցախեան հակամարտութեան էջը շրջւած չէ՛:
Հայաստանը պիտի հետամուտ լինի Արցախի հիմնահարցի՝ բանակցային օրակարգում ներառւելուն, բանակցութիւնների շարունակականութեանը եւ արցախահայութեան խախտւած իրաւունքների (թէ՛ անհատական, թէ՛ հաւաքական), այդ թւում եւ առաջին հերթին՝ համապատասխան անվտանգային երաշխիքներով արժանապատիւ վերադարձի իրաւունքի վերականգնմանը:
Իրական, կայուն ու երկարաժամկէտ խաղաղութեան բանաձեւ. Ադրբեջանի հետ «ամէն գնով խաղաղութեան հասնելու» հայեցակարգը չի կարող ընդունելի ու կիրառելի լինել: Կարգաւորումը պիտի հիմնւած լինի արդարութեան ու միջազգային իրաւունքի սկզբունքների վրայ եւ չի կարող ձեռք բերւել ի հաշիւ որեւէ կողմի արժանապատւութեան: Յարաբերութիւնների կարգաւորման գործընթացը պիտի հաւասարապէս հաշւի առնի բոլոր կողմերի շահերը: Եւ հնարաւոր չէ խօսել իրական, կայուն, երկարաժամկէտ խաղաղութիւնից, եթէ լուծւած չեն հումանիտար կարեւորագոյն խնդիրները՝ գերիների, պահւող անձանց եւ Արցախի՝ պատանդառւած ռազմաքաղաքական ղեկավարութեան վերադարձի հարցերը»,-ասւած է յայտարարութեան մէջ:
