Էդգար Էլբակեանը՝ «ԱԼԻՔ»-ի հետ զրոյցում. «Առաջին հերթին պէտք է այդ մտայնութիւնը փոխել, որ ինչ-որ բան տալով կարելի է խաղաղութեան հասնել»

Արտահերթ ընտրութիւնները միջոց են դէ ֆակտօ իշխանութիւնների ձեռքին անընդմէջ վերարտադրւելու, անընդմէջ վերաթարմացնելու իրենց լեգիտիմութիւնը եւ իրենց իշխելու նկատմամբ «արդարութեան» պաշարը: Այս մասին «ԱԼԻՔ»-ի հետ զրոյցում յայտնեց քաղաքագէտ Էդգար Էլբակեանը՝ անդրադառնալով, հարցմանը, որ ինչու է ՀՀ-ում նոր՝ արտահերթ ընտրութիւններ անցկացնելու թեման կրկին շրջանառութեան դրւել:

«Այն մեթոդ է, որ բռնապետական համակարգերում շատ տարածւած եւ ընդունւած է: Մեզ ամենածանօթ օրինակը՝ էրդողանական Թուրքիան է, որտեղ արդէն մօտաւորապէս 20 տարի Էրդողանը իշխանութեան է հէնց այդ գործիքակազմի բանեցմամբ, այսինքն անընդհատ արտահերթ ընտրութիւններ, Սահմանադրութեան փոփոխութիւններ, կառավարման համակարգի փոփոխութեան քայլերով իր իշխանութիւնն է պահում: Այն, բնականաբար, գործող իշխանութիւնների կեանքը երկարացնելու միջոց է: Զուտ ֆորմալ առումով, օրինական միջոցներով պատկերացնելը, որ ՀՀ-ում ընտրութիւններով հնարաւոր կը լինի իշխանափոխութիւն իրականացնել միամիտ ակնկալիք է, ընտրութիւնները ընդամէնը ամրագրում են գետնի վրայ առկայ եղած վիճակը, մինչեւ ընտրութիւնների պահը, իսկ այս պահին գետնի վրայ առկայ վիճակը ցաւօք յօգուտ դէ ֆակտօ իշխանութիւնների է»,- նշեց նա:

Քաղաքագէտը յիշեցրեց, որ իրենք հակահայկական կամ հակարցախեան ուժ էին եւ դա ի սկզբանէ պարզ էր, բոլոր այն մարդկանց համար, որոնք ծանօթ էին իրենց տեքստերին, գրաւոր ու բանաւոր հրապարակումներին, հայեացքներին: Խօսքը միայն «ռեժիմի պարագլխի» մասին չէ, այլ միւսները եւս: Իրենք միշտ են ունեցել հակահայկական եւ հակարցախեան հայեացքներ միշտ դէմ են եղել հայկական հողահաւաքի գաղափարին եւ Հայ Դատի գաղափարին, ուղղակի իրենց իշխանութեան գալու նախորդող երկու տարիների ընթացքում 2016-2018 եւ 2018-2020 թւականին տեսնում էին Արցախի հարցը ազգայնական թեմատիկան մեծ ժողովրդականութիւն ունի, եւ այդ թեման էին շահարկում, շահաբաժիններ ստանալու համար:

Էլբակեանը ընդգծեց, որ 2016-2018 թւականին ներկայիս դէ ֆակտօ վարչապետը ազատագրւած տարածքների փոխսակարկման մասին էր խօսում, եւ յայտարարում էր «Արցախը Հայաստան է եւ վերջ» ոչ թէ որովհետեւ ինքը ցանկանում էր այդ պահել, այլ, իրականում, դրա վրայ թքած ունէին, եւ եթէ թքած չունենային չէին կատարի այդ արտաքին ու ներքին քայլերը, որոնք յանգեցրին պատերազմի եւ մեր պարտութեանը: Օրինակ, չէին փաստացի լուծարի առաջին կորպուսը, որը ըստ մեր բանակի տրամաբանութեան պէտք է ապահովէր Արցախի հարաւային ճակատը պատերազմի դէպքում, իսկ իրենք համարեա լուծարման հասցրեցին այդ կորպուսը:

Ինչ վերաբերում է Ադրբեջանի հետ «խաղաղութեան պայմանագրի» կնքմանը, քաղաքագէտը շեշտեց, որ բնականաբար Ալիեւն ամբողջ Հայաստանի տարածքն է ցանկանում գրաւել եւ այն այնքան ակնյայտ է, որ նոյնիսկ այս իշխանութիւնների արտաքին գործերի նախարարն է այդ մասին յայտարարում եւ վկայում է, որ Ադրբեջանի եւ Թուրքիայի համար այն ամբողջական եւ լիակատար հակամարտութիւն է:

«Մենք ձախողել էինք նրանում, որ դեռ նախքան դէ ֆակտօ իշխանութիւններն հակամարտութիւնը ընկալել էինք, որպէս տեղային եւ այդպէս էլ կոչում էինք, բայց այդ պատերազմը ինքը հայ-ադրբեջանական, նոյնիսկ հայ-թուրքական էր, որովհետեւ Ադրբեջանի ստեղծողը եւ հովանաւորը Թուրքիան է, եւ որքան էլ թւայ ուշ է, եւ հնարաւոր չէ բան փոխել, բայց հնարաւոր է եւ առաջին հերթին պէտք է այդ մտայնութիւնը փոխել, որ ինչ որ բան տալով կարելի է խաղաղութեան հասնել եւ երկրորդը այն, որ խնդիրը զուտ ինչ-որ տարածքի մէջ է»,- նշեց նա:

ՍԻՒՆԷ ՖԱՐՄԱՆԵԱՆ