Փաշինեանի մեսիջն Ալիեւին. «ՀՀ-ն պատրաստ է խաղաղութեան պայմանագրի՝ առանց արցախահայերի իրաւունքների ամրագրման»
Դեկտեմբերի 19-ին Հայաստանի վարչապետ Նիկոլ Փաշինեանը հերթական հարցազրոյցը տւեց Հանրային հեռուստաընկերութեանը, որի ընթացքում անդրադարձաւ հանրութեանը հետաքրքրող բազմաթիւ հարցերի։ Փաշինեանը չշրջանցեց նաեւ Արցախեան հիմնահարցը եւ հերթական անգամ Արցախի շուրջ տեղի ունեցած աղէտալի իրադարձութիւնների համար պատասխանատու համարեց բոլորին, բացի իրենից։
Oragir.News-ի հետ զրոյցում քաղաքագէտ Ստեփան Դանիէլեանը համոզմունք յայտնեց, որ Փաշինեանի հարցազրոյցն ունէր մէկ գլխաւոր մեսիջ, որն ուղղւած էր Ադրբեջանին, Թուրքիային եւ միւս շահագրգիռ պետութիւններին։ Նրա խօսքով՝ Փաշինեանի ասելիքի հիմնական իմաստն այն էր, որ Հայաստանը համաձայն է Ադրբեջանի հետ խաղաղութեան համաձայնագրի ստորագրման գլխաւոր սկզբունքին։
«Ինքը վերջնականապէս ճանաչում է Ադրբեջանի տարածքային ամբողջականութիւնը՝ առանց Արցախի հայերի իրաւունքների մասին որեւէ դրոյթ արձանագրելու։ Սա իր պատասխանն էր նաեւ, որ ինքը պատրաստ է խաղաղութեան պայմանագրում այդ դրոյթն արձանագրել»,- նշեց նա։
Հարցին, թէ ինչու է Փաշինեանը պարբերաբար անդրադառնում Արցախի հարցին եւ փորձում պատասխանատւութիւնը բարդել նախկին իշխանութիւնների վրայ, երբ հասարակութիւնը կարծես թէ համակերպւել է ստեղծւած իրավիճակի հետ եւ որեւէ կերպ չի ընդվզում, քաղաքագէտը պատասխանեց, որ Ադրբեջանի տարածքային ամբողջականութիւնը՝ ներառեալ Արցախը, ճանաչելու համար Նիկոլ Փաշինեանին անհրաժեշտ էր որեւէ տրամաբանական շղթայ կառուցել եւ ցոյց տալ, որ ինքը ստիպւած է գնացել այդ որոշմանը։
«Սակայն դա կարեւոր չէ։ Այս հարցազրոյցում դա երրորդական, չորրորդական նշանակութիւն ունի, թէ ինքն ինչ է ասել։ Այս հարցազրոյցն առաջին հերթին ուղղւած էր Ադրբեջանին, իսկ թէ հանրութիւնն ու քաղաքական ուժերն ինչպէս կարձագանգեն, դա կը տեսնենք իրենց դիրքորոշումներից»,- կարծում է նա։
Մեր հարցին, թէ արդեօք նման կերպ Փաշինեանը փորձում էր հանրութեանը նոր զիջումնե՞ր պատրաստել, Դանիէլեանը նշեց՝ չի կարծում, որ Նիկոլ Փաշինեանի համար Հայաստանի բնակչութիւնը հետաքրքրութիւն է ներկայացնում, կամ բնակչութիւնը յստակ տեսակէտներ ունի։ Նա ընդգծեց՝ տեսակէտներ յայտնում են քաղաքական ուժերը, որոնք իրենցից քաղաքական կառոյցներ են ներկայացնում, կամ պէտք է ներկայացնեն, որին առաջիկայում ականատես կը լինեն։
Ստեփան Դանիէլեանը յաւելեց, որ բնակչութիւնից արձագանգներ սպասելը լուրջ չէ։ Նա ասաց, որ այդ արձագանգները կարող ենք սոցցանցերում կարդալ եւ մոռանալ, իսկ քաղաքական առումով դրանք ոչ մի խնդիր չեն լուծում։
