Թեհրանը նախազգուշացրել է Սիրիայում Իրանի հիւպատոսութեան վրայ յարձակման հետեւանքների եւ լարւածութեան աճի մասին
«ԱԼԻՔ»- ՄԱԿ-ում Իրանի ներկայացուցչի տեղակալը, յայտարարելով, որ Իրանի Իսլամական Հանրապետութիւնը խստօրէն դատապարտում է Իսրայէլի սարսափելի յանցագործութիւնները եւ տմարդի ահաբեկչութիւնները, այդ թւում՝ Սիրիայում Իրանի հիւպատոսութեան վրայ յարձակումը։ Նա զգուշացրել է այս դատապարտելի գործողութեան ծանր հետեւանքների մասին` նշելով, որ դա կարող է յանգեցնել տարածաշրջանում լարւածութեան աճի եւ աւելի մեծ հակամարտութիւնների պատճառ դառնալ։
ՄԱԿ-ում Իրանի մշտական ներկայացուցչի տեղակալ Զահրա Էրշադին ելոյթ ունենալով Անվտանգութեան խորհրդի նիստում, ասել է. «Իրանի Իսլամական Հանրապետութիւնը խստօրէն դատապարտում է այդ սարսափելի յանցագործութիւնները եւ տմարդի ահաբեկչական յարձակումները: Իսրայէլի ռեժիմը բացայայտ խախտում է ՄԱԿ-ի կանոնադրութիւնը, միջազգային օրէնքները, ինչպէս նաեւ Սիրիայի Արաբական Հանրապետութեան ինքնիշխանութիւնը, անկախութիւնը եւ տարածքային ամբողջականութիւն»։
Նա նշել է. «Իսրայէլի ռեժիմի արարքն աւելին է, քան յանցագործութիւն։ Այս յանցագործութիւնը եւ ահաբեկչութիւնը բացայայտ անարգանք է միջազգային հանրութեան կողմից ընդունւած սկզբունքի` ներկայացուցիչների եւ դիւանագիտական ու հիւպատոսական վայրերի անձեռնմխելիութեան նկատմամբ։ Համընդհանուր սկզբունք, որը ճանաչւած, յարգւած եւ ընդունւած է որպէս միջազգային յարաբերութիւնների հիմնաքարը։ Այս յանցագործութիւնն ակնյայտօրէն խախտում է դիւանագիտական եւ հիւպատոսական անձեռնմխելիութեան հիմնարար սկզբունքը, ինչպէս նաեւ` Դիւանագիտական յարաբերութիւնների մասին 1961 թւականի եւ Հիւպատոսական յարաբերութիւնների մասին 1963 թւականի Վիեննայի կոնւենցիան եւ, նաեւ, 1973 թւականի` Միջազգայնօրէն պաշտպանւած անձանց, այդ թւում` դիւանագիտական անձնակազմի դէմ յանցագործութիւնները կանխելու եւ պատժելու կոնւենցիան»:
