Նասեր Քանանի. «ՄԱԳԱՏԷ-ի հետ Իրանի համագործակցութիւնը հակակշռի չի ենթարկւում ապակառուցողական յայտարարութիւններով»
«ԱԼԻՔ» – Իրանի արտաքին գործերի նախարարութեան պաշտօնական ներկայացուցիչը, երէկ՝ նոյեմբերի 27-ին մամլոյ ասուլիսի ընթացքում հերքել է եւրոպական երեք երկրների յայտարարութիւնը, թէ՝ Իրանը խախտել է Միջուկային գործարքի համապարփակ ծրագրով ստանձնած պարտաւորութիւնները՝ ասելով, որ Ատոմական էներգիայի միջազգային գործակալութեան՝ ՄԱԳԱՏԷ-ի հետ Իրանի համագործակցութիւնը հակակշռի չի ենթարկւում ապակառուցողական յայտարարութիւններով։
ԻՌՆԱ-ի համաձայն՝ Նասեր Քանանին յայտարարել է. «Պարտաւորութիւնների փոխադարձ իրականացումը միջազգային պայմանագրերում սկզբունք է։ Իրանի միջուկային գործունէութիւնը, յատկապէս ուրանի հարստացումը, լիովին խաղաղ բնոյթ են կրում եւ համապատասխանում են NPT-ի վրայ հիմնւած Իրանի իրաւունքներին, եւ Իրանի խաղաղ միջուկային գործունէութիւնը միշտ եղել է Ատոմական էներգիայի միջազգային գործակալութեան հսկողութեան ներքոյ»։
Քանանին հաւաստել է. «Իրանը կատարել է Միջուկային գործարքի շրջանակներում իր ստանձնած բոլոր պարտաւորութիւնները, սակայն ոմանք իրենց այնպէս են պահում, կարծես Իրանը դուրս է եկել համաձայնագրից խախտելով թիւ 2231 բանաձեւը, եւ պարզ է, որ այդ դիրքորոշումներն արտայայտելու դրդապատճառները քաղաքական են»: Նասեր Քանանին ընդգծել է. «Որոշ կողմեր միտումնաւոր, կամաւոր պարտաւորութիւնները շփոթում են իրաւական պարտաւորութիւնների հետ եւ փորձում են մեղադրանքներ հասցէագրել Իրանի դէմ՝ թաքցնելով որոշ իրականութիւնները։ Միջուկային գործարքի համապարփակ ծրագիրը ունի յաւելւածներ, որոնց պէտք է հետեւեն բոլոր կողմերը»: Ըստ Նասեր Քանանիի. «Ատոմական էներգիայի միջազգային գործակալութեան հետ Իրանի համագործակցութիւնը հակակշռի չի ենթարկւում որոշ կողմերի յայտարարութիւնների շրջանակում, եւ երկու կողմերի համագործակցութիւնը կը շարունակւի նրանց միջեւ ստորագրւած համաձայնագրի հիման վրայ։ Միջուկային գործարքի համապարփակ ծրագրի հարցով բանակցութիւնների եւ դիւանագիտական բանակցութիւնների ուղին բաց է, եւ Իրանը որեւէ սահմանափակում՝ չունի որպէսզի Միջուկային գործարքի հարցով բոլոր կողմերը յանձնառու կերպով վերադառնան բանակցութիւններին»:
