Նախագահ Ռէյիսի. «Իրանի զօրակցութիւնը Պաղեստինին կատարելապէս համապատասխանում է Սահմանադրութեան սկզբունքներին»
«ԱԼԻՔ» – Այաթ. Սէյէդ Էբրահիմ Ռէյիսին ընդգծելով Իսլամական Հանրապետութեան բոլոր վարքագծերը Սահմանադրութեան սկզբունքներին համապատասխանեցնելու անհրաժեշտութիւնը, ընդգծել է. «Ճիշտ է, որ Պահապանների խորհուրդը իր գործառոյթի առումով, ուշադիր է, որ որեւէ բանաձեւ կամ խնդիր չհակասի Սահմանադրութեանը, սակայն բոլորս պատասխանատու ենք, որ մեր վարքագիծն ու գործողութիւնները լիովին համապատասխանեն Սահմանադրութեանը»։
Հանրապետութեան նախագահական կայքէջի համաձայն, այաթ. Ռէյիսին երէկ՝ դեկտեմբերի 3-ի առաւօտեան Սահմանադրութեան գործադրման պատասխանատւութեան ազգային երկրորդ համաժողովում յայտարարելով, որ այն ամէնը, ինչ մենք ունենք Սահմանադրութեան առումով, բխում է լուսահոգի Իմամ Խոմէյնիի իմաստութիւնից ու խելամիտ ղեկավարութիւնից, մեծարեց նրա եւ բոլոր նրանց յիշատակը, ովքեր դերակատար են եղել ազգային այս ուխտի մշակման ու հաստատման գործում:
Իր ելոյթի այլ բաժնում Հանրապետութեան նախագահը անդրադառնալով Գազային եւ Պաղեստինին Իրանի ցուցաբերած զօրակցութեանը, ընդգծել է. «Մեր զօրակցութիւնը Գազային եւ Պաղեստինին կատարելապէս համապատասխանում է Սահմանադրութեան սկզբունքներին, որը իրաւազրկւածներին զօրակցութիւնը համարում է Իսլամական պետութեան կարեւոր պարտականութիւններից մէկը: Քանզի Իսլամական յեղափոխութեան յաղթանակի սկզբից ի վեր, Իրանի Իսլամական Հանրապետութեան արտաքին քաղաքականութեան հիմնական սկզբունքներից եւ մօտեցումներից է եղել Պաղեստինի ժողովրդին զօրակցելը եւ այդ հարցը, որպէս Իսլամական աշխարհի առաջին հարց ճանաչելը, եւ այս սկզբունքը դեռ շարունակւում է, եւ աշխարհի քաղաքական իրավիճակում տեղի ունեցած իրադարձութիւնները եւ տարածաշրջանում ոմանց ցանկութիւնները չեն կարող փոխել մեր արտաքին քաղաքականութեան հիմնարար այս սկզբունքը»: Նախագահի հաւաստմամբ. «Այսօր պաղեստինցի նահատակների մաքրամաքուր արեան գնով, բոլորի համար պարզ է դարձել Իսլամական Հանրապետութեան աւելի քան քառասուն ամեայ դիրքորոշման իրաւացիութիւնը: Վստահ եղէք, որ աստւածային վրէժխնդրութեան ձեռքը վեր է յառնելու հէնց այս իրաւազրկւած երեխաների արիւնից եւ վերջ է տալու մանկասպան այս ռեժիմի կեանքին»:
