Իրանը կարեւորում է ծովագնացութեան անվտանգութիւնը եւ Հորմոզի նեղուցով էներգիայի անվտանգ անցումը

«ԱԼԻՔ» – Իրանի պաշտպանութեան փոխնախարար, գեներալ-մայոր Սէյէդ Մեհդի Ֆարահին Թեհրանում Օմանի սուլթանութեան ազգային պաշտպանութեան համալսարանի ղեկավար Ահմադ Բին Սալեմ Բա Օմարի հետ հանդիպմանը յայտարարել է, որ Հորմոզի նեղուցը եւ Օմանի ծովը կենսական նշանակութիւն ունի ողջ աշխարհի համար, եւ Իրանը միշտ կարեւորել է ծովագնացութեան անվտանգութիւնը, յատկապէս այս նեղուցով էներգիայի անվտանգ անցումը եւ իրեն յանձնառու է համարում այս ջրային ճանապարհի անվտանգութիւնն ապահովելու գործում։

Parstoday.ir-ի համաձայն՝ գեներալ-մայոր Ֆարահին յաւելել է. «Տարածաշրջանի անվտանգութիւնը պէտք է հաւաքական անվտանգութեան շրջանակում ապահովեն միայն տարածաշրջանի բոլոր երկրները, եւ արտատարածաշրջանային երկրների ներկայութիւնը բարդացնում է տարածաշրջանի անվտանգութեան պայմանները եւ չի օգնում դրա ապահովմանը»։

Իրանի պաշտպանութեան փոխնախարարը նշելով, որ Իսլամական Հանրապետութիւնը Օմանի սուլթանութեան անվտանգութիւնն ու կայունութիւնը համարում է իր անվտանգութիւնն ու կայունութիւնը, ասել է. «Գիտա-ակադեմիական համագործակցութիւնը, համագործակցութեան այն դրսեւորումներից է, որն անպայման կունենայ երկարաժամկէտ ազդեցութիւններ»։

Գեներալ Ֆարահին սիոնիստական ​​ռեժիմի կողմից Գազայի եւ Պաղեստինի ճնշւած ժողովրդի դէմ իրականացւող ցեղասպանութեան, ռազմական յանցագործութիւնների կատարման եւ ամենադաժան սպանութիւնների մասին նշել է. «Սիոնիստական ​​ռեժիմի կողմից մօտ 20 հազար անմեղ մարդկանց սպանութիւնը պայմանաւորւած է ԱՄՆ-ի համակողմանի աջակցութեամբ եւ միջազգային կազմակերպութիւնների լռութեամբ»։

Օմանի պաշտօնեաներն Իրանը համարում են մեծ հարեւան եւ համոզւած են, որ Իրանի հետ Օմանի սերտ յարաբերութիւնները հիմնւած են իրատեսութեան վրայ։