ԻՅՊԿ-ի ռազմածովային ուժերին միացան մէկ ռազմանաւ եւ ռազմավարական նշանակութեան հրթիռ արձակող լողացող կայանքներ
Երէկ՝ յունւարի 6-ին Իրանի Իսլամական յեղափոխութեան Պահապանների կորպուսի ռազմածովային ուժերին է միացել մէկ ռազմանաւ եւ հարիւր լողացող կայանքներ։
Դրանց թւում են նահատակ Աբու Մահդի Ալ-Մոհանդեսի անւան մարտական պարեկային ռազմանաւը, հրթիռներ արձակող չորս «Զոլֆաղար մոդել 16» նաւեր եւ հինգ «Աշուրա-Քոսար» պաշտպանական լողացող կայանքները:
Դրանից բացի, այլ սարքաւորումների թւում են հինգ «Աշուրա» տորպեդահարող լողացող կայանքներ, իննը «Մերսադ» մարտական հետախուզական լողացող սարքեր, հրթիռներ արձակող մէկ կատարելագործւած «Թարեղ» լողացող սարք եւ երկու «Աշուրա» հրամանատարական նաւակներ։
Հրթիռային կայանքները ներառում են երկու 40-փողանի տակտիկական հրթիռային կայանքներ, քսան 8-փողանի հրթիռային կայանքներ եւ 12 տակտիկական ականանետային կայանքներ։
Parstoday.ir-ի համաձայն՝ Իսլամական յեղափոխութեան Պահապանների կորպուսի ռազմածովային ուժերի հրամանատար գեներալ Ալիռեզա Թանգսիրին այս արարողութեան ժամանակ ասաց. «ԻՅՊԿ-ի ծովային ուժերին այս սարքաւորումների աւելացումը նախորդ տասնմէկ համալրումների շարունակութիւնն է՝ հզօրութեան բարձրացման գործընթացի շարունակման ուղղութեամբ»։
Իսլամական յեղափոխութեան Պահապանների կորպուսի գլխաւոր հրամանատար, գեներալ-մայոր Հոսէյն Սալամին նոյնպէս այս արարողութեան ժամանակ ասաց, որ Իրանի Իսլամական Հանրապետութիւնը, գիտակցելով ծովի նշանակութիւնը՝ որպէս մարտերում վճռորոշ, ճակատագրական ու առանցքային ասպարէզ, ձեռնամուխ է եղել արտասովոր ծովային ուժի ձեւաւորմանը, զարգացմանը եւ համալրմանը։
Նահատակ Աբու Մահդի Ալ-Մոհանդեսի անւան մարտական պարեկային ռազմանաւը, ելնելով ԻՅՊԿ-ի ռազմածովային ուժերի գործառնական կարիքներից, նախագծւել եւ արտադրւել է երիտասարդ իրանցի փորձագէտների կողմից՝ գիտելիքահենք ընկերութիւնների հետ համագործակցութեամբ:
