Ուրբաթ՝ մայիսի 31-ի երեկոյեան, Նոր Ջուղայի Հայ Մ. Մ. «Արարատ» միութեան Շահինշահրի մասնաճիւղի սրահում նշւեց Հայաստանի առաջին Հանրապետութեան 106-ամեակը:
Ծրագրին ներկայ էին՝ Սպահանի հայոց թեմի առաջնոդ Տ. Սիփան արք. Քէչէճեանը, քահանայ հայրեր, Իրանի Իսլամական խորհրդարանում Սպահանի եւ հարաւային իրանահայութեան պատգամաւոր Գեղարդ Մանսուրեանը, օրւայ բանախօս՝ Հայաստանից ժամանած պատմական գիտութիւնների դոկտոր-պրոֆեսոր Խաչատուր Ստեփանեանը, թեմի ազգային մարմինների, շրջանի Հայ Դատի յանձնախմբի եւ միութիւնների ներկայացուցիչներ, Շահինշահրի Հայ համայնքի վարչութեան անդամներն ու ժողովուրդ:
Սկզբում օրւայ առթիւ արտայայտւեց հանդիսավար Վարդուհի Պօղոսեանը, ապա Նոր Ջուղայի Հայ Մ. Մ. «Արարատ» միութեան Սկաուտական միաւորի անդամների միջոցով շրջափակ բերւեց Հայաստանի Հանրապետութեան եռագոյն դրօշը, որից յետոյ տեղի ունեցաւ դրօշի արարողութիւն եւ Հանրապետական մաղթանք՝ Տ. Սիփան արք. Քէչէճեանի նախագահութեամբ եւ թեմի եկեղեցական դասի մասնակցութեամբ, որն աւարտւեց ՀՀ օրհներգով:
Յաջորդիւ, Տօնակատարութեան յանձնախմբի խօսքն ընթերցեց Մարիտա Քեշիշեանը, որտեղ նշելով, թէ Հայաստանի առաջին Հանրապետութիւնը հայ ժողովրդի հաւաքական կամքի միահամուռ արտայայտութիւնն էր, կոչ էր արւել՝ կառչած մնալով Մայիս 28-ը կերտողների գաղափարին, մի անգամ եւս հերոսանալ եւ նոյն քաջութեամբ կերտել նորանոր էջեր՝ յանուն հայրենիքի ազատութեան եւ անկախութեան:
Բանախօս Խաչատուր Ստեփանեանն իր ելոյթում անդրադարձ ունենալով Արամ Մանուկեանի գլխաւորութեամբ Մայիսեան հերոսամարտերին եւ հայ ժողովրդի արձանագրած յաղթանակին՝ թւարկեց Հայաստանի Հանրապետութեան հիմնադրումից յետոյ երկրի բարգաւաճման եւ զարգացման ուղղութեամբ իրագործումները:
Նա իր խօսքի շարունակութեան մէջ աւելացրեց. «Թէեւ շատ չանցած Հայաստանը խորհրդայնացւեց, սակայն առաջին հանրապետութեան խորհուրդը շատ մեծ էր, քանի որ եթէ չլինէր այն, չէինք ունենայ Խորհրդային Հայաստանը եւ Հայաստանի երրորդ Հանրապետութիւնը»:
Բանախօսը իր խօսքի աւարտին նշելով, որ վերջին ժամանակներում վտանգւել են՝ Հայաստանի անկախ պետականութեան պահպանումը, ազգային արժէքներն ու նկարագիրը, երկրի սահմանների ապահովութիւնը, եկեղեցին եւ պատմութիւնն ու այլն, կոչ արեց՝ չհամակերպւել պարտադրւող իրողութեանը, ուժեղ լինել հզօր բանակ ունենալով եւ չխաբւել խաղաղութեան կեղծ խոստումներով:
Թեմակալ առաջնորդ Սրբազան Հայրն իր հայրական պատգամում յիշատակելով «Տաւուշը յանուն Հայրենիքի» շարժումը եւ ոմանց միջոցով եկեղեցու եւ սրբութիւնների նկատմամբ անյարգալից վերաբերմունքները՝ գնահատեց Բագրատ Սրբազանի գլխաւորութեամբ նշւած շարժման գործողութիւնները եւ ի պատասխան այն տեսակէտի, որտեղ ասւում է, թէ եկեղեցին չպէտք է միջամտութիւն ցուցաբերի քաղաքական հարցերում, աւելացրեց, քանի որ Տաւուշից տարածքներ յանձնելով վտանգւում են՝ ժողովրդի կեանքը, ունեցւածքը եւ եկեղեցու կալւածները, այդու հոգեւորականի պարտականութիւնն է լռելու փոխարէն ոտքի ելնի եւ բողոքի ստեղծւած վիճակի դէմ: Նա կոչ արեց, որպէս հաւատացեալներ որդիաբար ոտքի կանգնել, լինել Բագրատ Սրբազանի եւ զոյգ կաթողիկոսների կողքին եւ զգօնութեամբ ու հեռատեսութեամբ կանխել արհաւիրքը:
Ծրագրի եզրափակիչ բաժնում խանդավառ մթնոլորտ ստեղծւեց դիջէյ Վահէի ուրախ մեղեդիներով:
Թղթակից (Նոր Ջուղա)
