Հինգշաբթի՝ դեկտեմբերի 26-ին, ազգային առաջնորդարանի դահլիճում տեղի ունեցաւ Նոր տարւայ դիմաւորման հանդիսութիւն եւ ազգային առաջնորդարանի պաշտօնէութիւնը մտերմիկ մթնոլորտում հրաժեշտ տւեց 2024 թւականին:
Ցաւօք այս տարւայ եւս՝ խրախճանքին, առողջական խնդրի պատճառով հնարաւոր չեղաւ վայելել Թեհրանի հայոց թեմի առաջնորդ Տ. Սեպուհ արք. Սարգսեանի ներկայութիւնը, սակայն Տ. Առաքել աբղ. Գատէհճեանը փոխանցեց Թեմակալ Առաջնորդի հայրական օրհնութիւնն ու ջերմ բարեմաղթանքները:
Միջոցառմանը ներկայ էին Իրանի Իսլ. խորհրդարանում Թեհրանի եւ հիւսիսային իրանահայութեան պատգամաւոր Արա Շահվերդեանը, Թեմական խորհրդի դիւանի անդամներ՝ Վարուժ Յովհաննիսեանը, Արմինէ Սէթխանեանը, Հայրիկ Աղանեանը, Մհեր Օհանեանը, Շահէն Յարութիւնեանը եւ նոյն խորհրդի անդամ՝ Արթին Շահբազեանը:
Սկզբում ազգային առաջնորդարանի դիւանապետ՝ Զօրիկ Կարապետեանը պաշտօնէութեան անունից Նոր Տարւայ եւ Ս. Ծննդեան տօների առիթով, ջերմ շնորհաւորանքները փոխանցեց՝ Խորհրդարանի Պատգամաւորին եւ Թեմական խորհրդի անդամներին: Նա ընդգծեց, որ պաշտօնէութիւնը՝ իբրեւ մի մեծ ընտանիք, պատրաստակամ է վերանորոգ եռանդով շարունակելու իրեն վստահւած աշխատանքը:
Առանձին ելոյթներով արտայայտւեցին եւ շնորհաւորանքներ փոխանցեցին՝ Տ. Առաքել աբղ. Գատէհճեանը, Խորհրդարանի Պատգամաւոր՝ Արա Շահվերդեանը, Թեմական խորհրդի ատենապետ Վարուժ Յովհաննիսեանը նաեւ Հայրիկ Աղանեանը:
Վարուժ Յովհաննիսեանը անդրադառնալով, վերջին տարիների ընթացքին առաջնորդարանի դիմագրաւած տնտեսական եւ տարբեր պատճառներով գոյացած մարտահրաւէրներին յոյս յայտնեց, որ 2025 թւականը բոլորի համար լինի բարեբեր ու յաջողութիւններով լի տարի։ Նա իր արտայայտութիւններում ընդծեց հասարակութեանը լաւագոյն ծառայութիւնը մատուցելու եւ գոհունակ պահելու պարտաւորութեան կարեւորութեանը եւ նշեց, որ դա հնարաւոր կը լինի միասնական եւ ջանադիր աշխատանքով, որին հարկ է նախանձախնդիր լինել:
Ազգային առաջնորդարանի Հանրային կապ
