Ատրպատականի հայոց թեմի առաջնորդ Սրբազան Հայրը բանախօսեց Թեհրանում, Ղուրանի եւ Մշակութային արւեստի համալիրում

Ատրպատական, ազգային առաջնորդարան, Թաւրիզ – Երկուշաբթի, յունւարի 27-ին, Թեհրանում, երեկոյեան ժամը 9-ից 10, Ատրպատականի հայոց թեմի առաջնորդ՝ Տ. Գրիգոր արք. Չիֆթճեանը բանախօսեց, Ղուրանի եւ Մշակութային արւեստի «Հազրաթ Աբուլֆազլ» համալիրի սրահում, աւելի քան երկու հազար ունկնդիրների ներկայութեան, կազմակերպութեամբ «Օֆող» հեռուստակայանի տնօրէնութեան:

Ղուրանի ընթերցման պահին, Սրբազան Հայրը ոտքի կանգնեց, յարգելու համար միաստւածեան այլ կրօնի գիրքը, բարձր գնահատանքի արժանանալով բոլոր ներկաների բարձրաձայն վկայութեամբ:

Հարցախոյզի հաղորավարութեամբ եւ չորս մասնագէտ հարցադրողների ներկայացրած կրօնական, քաղաքական եւ մարդասիրական հարցերին պատասխանելով, առաջնորդ Սրբազան Հայրը բեմի կենտրոնում նստած ծափողջոյնների արժանացաւ, հայերէն, անգլերէն, արաբերէն, ֆրանսերէն եւ թուրքերէն լեզուներով արտայայտւելով ներկայացւած բոլոր հարցերին:

Ս. Մարիամ Աստւածամօր մասին Ղուրանում  արձանագրւած  վկայութիւնից վերառնելով օրինակը, նա  քրիստոնէութեան հետ նրանց եւ մուսլման կանանց գլխաշորի գործածութեան նոյնութիւնը նշեց, Առաքելական նամակներում յիշւած օրէնքը վերյիշելով, երբ այր մարդիկ եկեղեցում գլխաբաց, իսկ կանայք գլխաշորով են լինելու:

Սոյն արտայայտութիւնները եւ գնահատանքի խօսքերը կանանց բարոյական բարձրութեան մասին, ներկայ բազմութեան մեծաձայն ծափողջոյնների արձագանգին արժանացան:

Սրբազան Հայրը պատասխանելով նաեւ Մերձաւոր Արեւելեան քաղաքական իրադարութեան հարցերին, պաղեստինեան ժողովրդի անմեղ երեխաների ցաւալի կոտորածներին անդրադարձաւ, նշելով մարդկային իրաւանց պաշտպան երկրների անտարբերութիւնը, սակայն միւս կողմից, կենդանական աշխարհի նկատմամբ ունեցած խնամատարութեան բարձր ոգին:

Հարցադրողները անդրադարձան Ատրպատականում Սրբազան Հօրը մտերիմ յարաբերութեան Թաւրիզի հանգուցեալ աղօթապետ Ալէ Հաշեմի հետ, լսելով նաեւ Սրբազանի խօսքերը, հանգուցեալի հայասէր մօտեցումների մասին:

Շուրջ 40 րոպէ տեւած բանախօսութիւնը աւարտւեց, հարցախոյզի անդամների երաժշտական կատարումներով, խրախուսելու համար բոլոր հանդիսականներին, որոնք մասնակցեցին կատարումներին, եւ իրենց երախտագիտութիւնը յայտնեցին Սրբազան Հօրը, շահեկան բանախօսութեան համար:

Սրահում, մուսուլման գլխաւոր կրօնաւորը՝ Ղոլամ Ռեզա Ղասեմեանը բեմ բարձրացաւ եւ սրտագին ողջագուրմամբ, ներկայ հսկայ բազմութեան եւ անձնապէս իր յարգանքը ընծայեց Սրբազան Հօրը: Նշենք, որ Սրբազան Հօրը ընկերակցում էին Թեհրանի հայլեց թեմից Տ. Արիստակէս քհնյ. Շահմիրեանը եւ Ատրպատականի Թեմական խորհրդի ատենապետ՝ Գագիկ Ջորջեանը: