Հայոց Ցեղասպանութեան 111-ամեակի առիթով Ատրպատականի հայոց թեմի ոգեկոչական Կենտրոնական ձեռնարկը՝ Թաւրիզում

Ատրպատական, ազգային առաջնորդարան, Թաւրիզ – Ապրիլի 26-ի երեկոյեան ժամը 7:00-ին, Թաւրիզում կայացաւ Հայոց Ցեղասպանութեան 111-ամեակի Կենտրոնական ձեռնարկը, հովանաւորութեամբ եւ նախագահութեամբ Ատրպատականի հայոց թեմի առաջնորդ՝ Տ. Գրիգոր արք. Չիֆթճեանի եւ Թեմական խորհրդի:

Շուրջ մէկ ամիս առաջ թեմում կեանքի կոչւած, Հայոց Ցեղասպանութեան 111-ամեակի յատուկ յանձնախումբը, գլխաւորութեամբ Ազգային իշխանութեան, Թաւրիզում, ազգային առաջնորդարանի «Համազասպ Ոսկանեան» սրահում ի գործ դրեց մի արժանաւոր ձեռնարկ, ի յարգանս մեր մէկ ու կէս միլիոն սրբադասեալ նահատակաց:

Ոգեկոչական ծրագրի բացման խօսքը կատարեց Սաթուշ Բաբայեանը: Նա շեշտեց, որ հաւաքւած բազմութիւնը միայն ոգեկոչական ձեռնարկի համար չի եկել, այլ արդարութեան պահանջատէր հանդիսանալու: «Թշնամին, մեր ազգին մահւան ճամբայ տանելով, մտածում էր, թէ նրանք իրենց հետ կը տանեն, հաւատը, յոյսը, մշակոյթը, լեզուն, եւ այն ինչ որ մեր ինքնութիւնն է: Ոչ ոք չկարողացաւ խլել մեզանից մեր ոգին, մեր գոյութեան իրաւունքը, եւ մեր անմար սէրն ու կապւածութիւնը հայրենիքին»,- ասաց նա:

Հանդիսութեան ընթացքում, հերթաբար ելոյթ ունեցան Թաւրիզի հայոց դպրոցի աշակերտներ՝ Վանէ Բահադորեանը, Մանանա Բադալեանը եւ Մարիամ Վարդանեանը յատուկ խօսքերով անդրադառնալով Հայոց Ցեղասպանութեան: Ապա, միութիւնների եւ կազմակերպութիւնների անդամ-անդամուհիներ երգի ու ասմունքի ելոյթներ ունեցան: Արսինէ Բաբայեանը Վարանդի «Արեան մղձաւանջ»-ը արտասանեց, երաժշտութեան ընկերակցութեամբ Կարէն Սարգսեանի: Թադէ Նազարբէգեանը Կոմիտասի «Շուշիկ»-ը նւագեց դաշնամուրի վրայ: Միրօ Աբրահամեանը երգեց «Ադանայի ողբը», երգեհոնի ընկերակցութեամբ Կարէն Սարգսեանի: Ռեբեկա Սարգսեանը մեներգեց «Յուշարձաններ» երգը, դարձեալ Կարէնի դաշնամուրային ընկերակցութեամբ: Յովհաննէս Շիրազի «Արարատ»-ը ասմունքեց Փաթրիշիա Դանղեանը:

Օրւայ պատգամը եւ օրհնութեան խօսքը փոխանցեց առաջնորդ Սրբազանը: Նա մանրամասն օրինակներով, եւ յատկապէս մեր հայրենիքի ներկայ շրջանային եւ քաղաքական դրութիւնների ակնարկով ներկայացրեց այն կացութիւնը, որով երեւակայական եւ անլուծելի ճակատագիր է սպառնում Հայոց Ցեղասպանութեան. «Մասնագէտների, կամ գիտնականների յանձնելի մարդկային իրաւանց վերաբերող մի իրականութիւն, դրանից խուսափելի միջոց է պարզապէս…: Ով որ համարձակւի նման քայլերի քաջալեր հանդիսանալ, կամ առիթ տալ, դա դաւաճան է մեր ազգին, եւ կրում է թշնամու վերարկուն»,- ասաց Սրբազանը: Նա յիշեց իր սեփական գերդաստանի կրած նեղութիւններն ու մազապուրծ ազատիլը տարագրութեան ողբերգութիւնից, այն համեմատելով աստւածային հրաշքի հետ: Վերջապէս, նոր սերնդի կազմաւորման մէջ Հայոց Ցեղասպանութեան յատուկ նիւթը ուսումնական ծրագրում ներառելը նկատեց անհրաժեշտ, յիշելով Ազգային այն դպրոցները, Սփիւռքում, որոնք յատուկ դասաժամեր են յատկացնում դրան:

Առաջնորդ Սրբազանը սոյն առիթով բեմ հրաւիրեց Պատգամաւորական ժողովի եւ Թեմական խորհրդի ներկայացուցիչ անդամներին եւ նրանց ներկայութեամբ բարձր գնահատեց այն անձերին, որոնք անցնող ամիսներին Ատրպատականի հայոց թեմի «Մելիք Թանգեան» թանգարանի վերադասաւորման աշխատանքներում օժանդակութիւն էին ցուցաբերել: Սրբազանը յատկապէս գնահատեց Թանգարանի պետական պատասխանատւութիւնը ստանձնած տեսչուհի Սիլւա Աշըղեանին, եւ Թանգարանի տնօրէնութիւնը ստանձնած Վահիկ Բարոյեանին, որոնք ներկայ դժւարին պայմաններում իրենց բծախնդիր կեցւածքը ցուցաբերեցին, նման պատասխանատւութեան տակ մտնելով: Այս առիթով, Սրբազանը յատուկ արձանագրութեամբ մետաղեայ յուշագրեր յանձնեց նրանց:

Գնահատւողների շարքում էին նաեւ Թանգարանի գոյքերի ցուցադրման եւ վերանորոգման աշխատանքներին իրենց յարատեւ մասնակցութիւնը բերող Սեւան սրկ. Ենովքեանը եւ վարպետ Մոսիկ Ալեքսանեանը, որոնք ցարդ շարունակում են իրենց աշխատանքը, ամբողջացնելու համար բոլոր իրերի դասաւորումը շէնքում:

Սրբազանը յատուկ «Գիր Գնահատանաց»-ով պարգեւատեց Թանգարանի առաջին յարկի միջին պատը յատուկ նկարով գեղազարդած արւեստագիտուհի Փոլետ Բենոյեանին: Սրբազան Հօր օրհնութեան գիրը ընթերցեց Տ. Մարտիրոս քհնյ. Ղուկասեանը: Սրբազան Հայրը եզրափակելով օրւայ նշանակալից ծրագիրը, ասաց. «Փոքրաթիւ համայնք ենք, սակայն մեր բազմազան շնորքներով օժտւած իւրաքանչիւր անհատը, ինքնին հարստութիւն է: Երբեմն մեծաթիւ գաղութներում փնտրելով փնտրում են հարկ եղած անձերը, եւ չեն գտնում: Մեր հարստութիւնը գանձարկղում եղած փողը չէ, որը յաճախ գոյութիւն չունի այնտեղ, այլ դուք էք, սիրելի ժողովուրդ: Դուք էք գանձը, դուք էք հարստութիւնը մեր»,- շեշտեց Սրբազանը:

Եզրափելով օրւայ խորհուրդը, առաջնորդ Սրբազանը ծրագրի երկրորդ մասը ներկայացրեց իբրեւ հայ ժողովրդի Ցեղասպանութիւնից վերյառնելու շօշափելի առիթ ու յուսադրիչ ապագայ թեմի համար. «Թշնամին թող մտածի թէ ոչնչացրել է մեր ազգի գոյութիւնը, երբ 750 տարւայ մեր թեմը վերաբացում է իր դարաւոր գոյքերի Թանգարանը՝ Թաւրիզում…»,- եզրափակեց Սրբազանը: