«ԱԼԻՔ» – Սրբոց Թարգմանչաց տօն, Սասուն հայահոծ քաղաքամաս, եւ Սրբոց Թարգմանչաց եկեղեցի, որի տարածքում այդ օրւայ հիմնական միջոցառման նշումը դարձել է աւանդոյթ:
Այս տարի աւանդոյթը դարձաւ միասնականութեան խորհրդանիշ ներշնչող գեղարւեստական յայտագրի իրագործում, որի կազմակերպման հարցով Թեհրանի հայոց թեմի առաջնորդ Տ. Սեպուհ արք. Սարգսեանի հովանաւորութեամբ, իրենց միաւորներով համագործակցել էին՝ Սրբոց Թարգմանչաց եկեղեցու Եկեղեցական խորհուրդը, Հ. Մ. «Սիփան» միութիւնը, Հ. Մ. Մ. «Րաֆֆի» համալիրը եւ Փերիոյ Կրթասիրաց միութիւնը:
Տէրունական աղօթքով մեկնարկած գեղարւեստական յայտագրի բացման խօսքով յանձնախմբի անունից իր ողջոյնը փոխանցեց Արփի Ալավերդեանը անդրադառնալով Հայ եկեղեցու եւ հոգեւորականութեան անմնացորդ դերը հայ ժողովրդի կեանքում եւ կարեւորեց ազգային արժէքների պահպանումը: Նա ապա հրաւիրեց թեմակալ առաջնորդի պատգամը փոխանցելու Տ. Արիստակէս քահանայ Շահմիրեանին: Պատգամի մէջ կարեւորութեամբ անդրադարձ էր կատարւել հայոց դպրոցների, հայ ուսուցիչների, միութիւնների եւ հայ ընտանիքի դերակատարութեանը հայապահպանման առումով: Օրւայ հաղորդավարն էր Լիլիթ Սարդարեանը, ով իր հայրենաշունչ խօսքերով աւելի ոգի էր ներշնչում ծրագրին:
Միջոցառումը շարունակւեց Հ. Մ. «Սիփան» միութեան «Կոմիտաս» երգչախմբի ազգային-հայրենասիրական երգերի կատարումներով խմբավարութեամբ՝ Լուսինէ Միքայէլեանի: Ասմունքային կատարումներով հանդէս եկան «Սիփան» միութեան «Աւիւն» ասմունքի խումբը ղեկավարութեամբ՝ Արփի Ալավերդեանի, որը տարբեր հատւածներում ներկայացրեց հայրենասիրական ասմունքային կատարումներ նաեւ ասմունքեց Փերիոյ Կրթասիրաց միութիւնից՝ Լիաննա Միրաւագեանը: Գեղարւեստական յայտագրում ազգագրական առանձին պարերով հանդէս եկան Հ. Մ. Մ. «Րաֆֆի» համալիրի «Գարուն» պարախումբը ղեկավարութեամբ՝ Կարինէ Պետրոսեանի եւ Հ. Մ. «Սիփան» միութեան «Սիփան» պարախումբը գեղարւեստական ղեկավար եւ բեմադրիչ Կարինէ Մանուչերեան: Մեներգերով ելոյթ ունեցան՝ «Սիփան» միութիւնից պատանիներ՝ Ադելին Մադաթովեանն ու Մերեդիթ Տէր Կարապետեանը, ղեկավար՝ Ժիլբերթ Կարապետեանի, եւ «Րաֆֆի» համալիրի «Հորիզոն» նւագախումբը, մեներգիչ եւ ղեկավար՝ Համլետ Խաչատրեան:
Միջոցառմանը հրաւիրւել էր Հ. Մ. «Արարատ» կազմակերպութեան «Արարատ» եւ Հայ Համալսարանականների Ընդհանուր միութեան «Տաւիղ» համատեղ երգչախումբը խմբավարութեամբ Արփի Սիմրոջեանի (Նազարեան), դաշնակահար Արեգ Մարգարեան:
Ծրագրին իրենց ներկայութիւնն էին բերել՝ Թեհրանի հայոց թեմի Թեմական խորհրդի ատենապետ Վարուժ Յովհաննիսեանը, Կրթական խորհրդի ատենապետ Կարինէ Բալըքչեանը, Թ. Հ. Թ. Պատգամաւորական ժողովի, «Ալիք» հաստատութեան եւ դպրոցների ներկայացուցիչներ եւ մեծ թւով հայրենակիցներ:
Գեղարւեստական յայտագրի աւարտին հրաւիրւեց իր խօսքը փոխանցելու Իրանի Իսլամական խորհրդարանում Թեհրանի եւ հիւսիսային իրանահայութեան պատգամաւոր դկտր. Արա Շահվերդեանը: Իր ելոյթի ընթացքում պատգամաւորը գնահատելով կազմակերպւած համատեղ միջոցառումը, շնորհաւորեց Սրբոց Թարգմանչաց տօնը ուսուցիչներին եւ արւեստի ոլորտով զբաղւող անձանց կարեւորելով հայ նոր սերնդի մօտ հայեցի դաստիարակութեան սերմանման անհրաժեշտութիւնը եւ ընդգծեց, որ բոլորի պարտքն է, նոր սերնդին փոխանցել հայեցի մտածողութիւն:
Լուսանկարները՝ ՀԱՏԻՍԻ
