Հ. Մ. «Սարդարապատ» միութեան վարչութեան մտայղացմամբ կայացաւ «Ողջոյն Հեշմաթիէ» 2 միջոցառումը
![](/wp-content/uploads/2024/03/heshmatie-20240318-780x470.jpg)
Հ. Մ. «Սարդարապատ» միութեան վարչութեան մտայղացմամբ եւ իհարկէ թաղեցիների ցանկութեամբ թւականիս հինգշաբթի, փետրւարի 22-ին Սրբոց Վարդանանց եկեղեցու սրահում 2-րդ անգամ մեծ շուքով ու խանդավառութեամբ նշւեց «Ողջոյն Հեշմաթիէ» 2 ուրախ ժամանցը:
Ծրագիրը իր բնոյթով նմանակում էր անցեալի հին ժամանակաշրջանին, որը իր մէջ ընդգրկել էր հին Հէշմաթիէ քաղաքամասը իր թաղեցիներով: Սրահն կահաւորւել էր եւ ցուցահանդէս էր տրամադրւել «Սահակեան» դպրոցի աշակերտութեան, բնակչութեան, ազգային կառոյցների պատկերներով:
Սրահում իր յատուկ տեղն ունէր «Սահակեան» դպրոցի ուսուցչական կազմը ուր ներկաներից դպրոցի փոխտեսչուհի Սոֆիկ Խեչումեանը դպրոցի զանգը ղօղանջելով սկսեց ծրագիրը, որով ներկաներին մի պահ վերադարձրեց դպրոցական տարիներ: Ծրագրի գեղարւեստական բաժինը շարունակւեց օրւայ հաղորդավար Ժասմենա Առաքելեանի բարեգալստեան եւ բացման խօսքով ուր ամփոփ ներկայացւեց քաղաքամասի պատմականի նախաբանը, ապա եւ ցուցադրւեցին քաղաքամասի հին պատմականը ներկայացնող տեսաժապաւէնները, որը նկարագրում էր քաղաքամասի կրօնական-հասարակական կեանքը:
Ասմունքներով հանդէս եկան Անուշ Աւանէսեանը, ով ասմունքեց բանաստեղծ Մարտիրոս Օհանջանեանի «Ողջոյն Հեշմաթիէ» ստեղծագործութիւնը, որը նւիրւած էր ձեռնարկի օրւան:
Ծրագրին ներկայ էր նաեւ բանաստեղծուհի Իրինա Մանսուրեանը, ով ասմունքեց իր գրչին պատկանող Ձօն ««Սարդարպատ» միութեանը եւ Հեշմաթիէ քաղաքամասին», նաեւ «Յոյսով եմ սակայն» բանաստեղծութիւնները:
Ապա հրաւիրւեց միութեանս հիմնադիր եւ վարչութեան նախագահ Մուշեղ Ծատուրեանը օրւայ առթիւ արտայայտւելու համար, ով իր խօսքում մանրամասն անդրադարձաւ միութեան աշխատանքների 40-ամեայ գործունէութեանը եւ ապա բարձր գնահատեց ներկաներին միութեան հրաւէրի ընդառաջման համար եւ գնահատեց կազմակերպիչ յանձնախմբին:
Հարկ է համարւում նշել, որ միութեանս վարչութիւնը ծրագրի թւականը յատուկ նկատի էր առել իր հովանաւորութիւնը տալով Իրանի Իսլամական խորհրդարանի 12-րդ շրջանի ընտրութիւնների քարոզարշաւի ի օգուտ մեծարգոյ պատգամաւոր Արա Շահվերդեանի:
Ծրագրի երկրորդ բաժինը յագեցած էր խրախճանքով եւ ուրախ երաժշտութեամբ, որի համար հրաւիրւեց Գուրգէն Քարամեանը, ով հեղինակն էր «Հին Հեշմաթիէ» ցուցադրւող տեսաժապաւէնի եւ հակիրճ ներկաներին ներկայացրեց ֆիլմի պատմութիւնը:
Օրւայ սեղանապետն էր Ռազմիկ Այդինեանը, ով շատ մեծ աշխուժութիւն փոխանցելով, նաեւ իր սրամտութիւններով ծրագիրը էլ աւելի խանդավառեց ներկաների հետ մտերմաբար անդրադառնալով անցեալի յուշերին:
Հիւրասիրութեան բաժնում ուտեստեղէնը պատրաստւել էր 50-ական թւականներին համահունչ մտայղացմամբ, նաեւ օրւայ երաժշտութիւնն, երգն ու պարը եւս համապատասխան էր անցեալին:
Ներկաները մեծ բաւարարւածութիւն էին ստացել ծրագրի թէ՛ մթնոլորտից, եւ թէ՛ տեսակից բոլորի մօտ արթնացել էր մի վաղեմի յուշեր, քանի որ հանդիպել էին իրենց անցեալի համադասարանցիներին եւ ընկերներին: Հիացմունքով եւ բարձր բաւականութեամբ գնահատելով կատարւած աշխատանքը սրահն թողեցին իրենց հետ տանելով բարձր տրամադրութիւն:
Հարկ է համարւում նշել, որ հիւրերի համար պատրաստւել էր անակնկալ նկարւելու մի բաժին, ովքեր պէտք է նկարւէին «Սահակեան» դպրոցի աստիճաններին, որն ինքնին բոլորին տարել էր վաղ պատանեկութիւն:
Վարձքներդ ի կատար:
Հ. Մ. «Սարդարապատ» միութեան Հանրային կապ
Ժասմենա Առաքելեան