Ադրբեջանական շրջափակման ու հրաշքով փրկւելու պատմութիւնը Կոլիա Ստեփանեանի «Որտե՞ղ» գիրքում

Ադրբեջանական շրջափակման ու հրաշքով փրկւելու պատմութիւնը՝ մէկ գրքում․ ՀՀ ԳԱԱ-ում ներկայացւեց Կոլիա Ստեփանեանի «Որտե՞ղ» գիրքը։

ՀՀ ԳԱԱ Պատմութեան ինստիտուտը եւ «Հայոց տուն» նախաձեռնութիւնը «Կենդանի պատմութիւն» միջոցառման շրջանակում հիւրընկալել էին 44-օրեայ պատերազմի մասնակից եւ հրաշքով փրկւած Կոլիա Ստեփանեանին եւ իր հինգ ընկերներին։

Արսէն Այւազեանը, Արման Արմաղանեանը, Դաւիթ Սահակեանը, Արթուր Յարութիւնեանը եւ Ռուսլան Թումանեանը եւ Կոլիա Ստեփանեանը 70 օր ադրբեջանական շրջափակումից փրկւած տղաներն են, Կոլիա Ստեփանեանի «Որտե՞ղ» գրքի իրական հերոսները։ Նրանց 70-օրեայ պայքարի ու ողջ մնալու ճանապարհի մասին պատմող գիրքը ներկայացւեց «Կենդանի պատմութիւն» միջոցառմանը։

Միջոցառմանը ներկայ էին նաեւ տղաների ծնողները։

«Մենք իրենց ենք կեանք պարգեւել, իրենք էլ իրենց վերադարձով են մեզ կեանք պարգեւել։ Հիմա աւելի ուժեղ եմ, քան երբեւէ»,- արցունքները զսպելով ասաց Ռուսլան Թումանեանի մայրը՝ տիկին Կարինէն։

Կոլիա Ստեփանեանը պատմեց, որ գիրքը, թէեւ գեղարւեստական է ու որոշակիօրէն վերաշարադրումն է իրադարձութինների, բայց նկարագրւած բոլոր գործողութիւնները իրականութիւնն են՝ վերաիմաստաւորւած դէպքերից տարիների յետոյ։ Մանկուց գրող դառնալու երազանքն իրականացրած Կոլիան իսկապէս արձանագրել է կենդանի պատմութիւնը, որն ապագայ սերունդներին՝ զուտ նկարագրութիւնից բացի՝ շատ ասելիք ու պատմելիք ունի։

«Հայոց տուն» նախաձեռնութեան համահիմնադիր, բժշկագիտութեան դոկտոր, պրոֆեսոր Արմէն Չարչեանը տղաներին յորդորեց ընտանիք կազմել, սերունդը շարունակել. «Դուք յաղթել էք մահւանը, հիմա պիտի յաղթէք կեանքում եւ պէտք է յաղթէք՝ սերունդ ունենալով»,-ասաց պրոֆեսորը։

«Գիրքը իսկապէս կենդանի պատմութիւն է այն մասին, թէ ինչ ոգու տէր են հայ երիտասարդները։ Ամէն էջում արձանագրւած պատմութիւն է»,-ասաց ՀՀ ԳԱԱ Պատմութեան ինստիտուտի տնօրէն, ակադեմիկոս, պատմական գիտութիւնների դոկտոր, պրոֆեսոր եւ «Հայոց տուն» նախաձեռնութեան հիմնադիր անդամ Աշոտ Մելքոնեանը։

«Դուք կենդանի լեգենդներ էք։ Դուք ձեր օրինակով, հայկական պետականութեանը ձեր նւիրւածութեամբ դարձաք հերոսներ»,- իր խօսքում նշեց «Հայոց տուն» նախաձեռնութեան նախաձեռնող խմբի անդամ, Պատմական գիտութիւնների դոկտոր, պրոֆեսոր, ՀՀ արտակարգ եւ լիազօր դեսպան Ռուբէն Կարապետեանը։

yerkir.am