Ցուցադրւել է «Բացակայ պատկեր» ֆիլմը՝ նւիրւած Արտաւազդ Փելեշեանին
«Մոսկւա» կինոթատրոնում կայացել է ռեժիսոր Հրանտ Վարդանեանի «Բացակայ պատկեր» ֆիլմի առաջին ցուցադրութիւնը՝ նւիրւած ռեժիսոր, սցենարիստ, դերասան, համաշխարհային կինեմատոգրաֆիայի դասական Արտաւազդ Փելեշեանին:
Միջոցառմանը ներկայ են եղել Արտաւազդ Փելեշեանի կինը՝ Այիդա Սարգսեանը, կինոաշխարհի ներկայացուցիչներ եւ կինոսէրներ:
Ֆիլմը ստեղծւել է փաստավաւերագրական ֆիլմերի «Հայկ» կինոստուդիայի եւ «Արեւ» ֆիլմ-ստուդիայի համատեղ արտադրութեամբ: Ֆիլմի շնորհանդէսը կայացել է Հայ կինոյի 100-ամեայ յոբելեանական միջոցառումների շրջանակում՝ Արտաւազդ Փելեշեանին նւիրւած յոբելեանական ցուցադրութեամբ, որը կազմակերպել էր Հայաստանի ազգային կինոկենտրոնը:
«Այս ֆիլմը փորձ էր՝ խօսելու Փելեշեանի հետ իր լեզւով: Կինոյի նեարդը զգացող այս հսկան համաշխարհային կինոպատմութեան մէջ իր ուրոյն ձեռագիրն ունի: Նա իր փոքր պատուհանը բացեց կինոաշխարհում՝ իր արւեստով շատ կարծրատիպեր կոտրելով: Ես հասկացայ, որ կինոն կարող է լինել առանց խօսքի, եւ միեւնոյնն է՝ դու հասկանաս, թէ ինչ է այն ուզում ասել»,- ասել է «Բացակայ պատկեր» ֆիլմի ռեժիսոր Հրանտ Վարդանեանը:
«Բացակայ պատկեր» ֆիլմը սեւ-սպիտակ է։ Ֆիլմը նկարելիս ռեժիսորն օգտագործել է նաեւ հատւածներ՝ Արտաւազդ Փելեշեանի տարբեր ֆիլմերից։ Դրանք հիմնականում կինոէկրանին են ու տարբեր առիթներով ցուցադրւում են տարբեր քաղաքների կինոդահլիճներում։
«Բացակայ պատկեր» ֆիլմի կադրերում Արտաւազդ Փելեշեանը տիկնոջ հետ շրջում է այն վայրերով եւ քաղաքներով՝ Լիսաբոն, Փարիզ, Լիոն, Երեւան, որտեղ Վարպետի հետ հանդիպումներ են կազմակերպւել։ Նրա վարպետութեան դասերը, խօսքը, կինոցուցադրութիւնները նկարահանւել են՝ որպէս փաստագրական նիւթ։
168.am
