Արամ Ա Վեհափառ Հայրապետին պատգամը՝ Հայաստանի Առաջին Հանրապետութեան անկախութեան 108-ամեակի տօնին առիթով

Մայիս 28-ն դէպք ու թւական ըլլալէ անդին, խորհրդանիշ է Հայաստանի անկախութեան:

Մայիս 28-ն հոմանիշ է ազգային վեհ իդէալներուն շուրջ համախմբուելու հայ ժողովուրդի հաւաքական կամքին:

Մայիս 28-ն յուշարար է հաւատքի ոյժով ու անմնացորդ նւիրումով ու նո՛յնիսկ արեան նահատակութեամբ հայրենիքին համար պայքարելու ամուր յանձնառութեան:

Այսպէս եղած են մեր պատմութեան խորհրդանիշերը: Անդրանցնելով իրենց ժամանակի նեղ սահմանները, անոնք դարձած են խորհրդանիշ սրբազան արժէքներու, լուսափայլ փարոս՝ մեր կեանքի խաւար ճամբան լուսաւորող, անլռելի զանգակատուն՝ մեզ թմբիրէն արթնցնող, զգաստութեան կոչ՝ կեանքի մոլոր ճամբաներէն զգուշացնող:

Այսպէս է նաե՛ւ Մայիս 28-ն:

Այս գիտակցութեամբ Մայիս 28-ի ոգիով ու պատգամով սերունդներ կերտւեցան: Եկեղեցի, դպրոց ու ակումբ Մայիս 28-ով խորհրդանշւող Հայաստանի անկախութեան տեսլականով ու գաղափարականով սերունդներ դաստիարակեցին:

Ժամանակները կը փոխւին, սերունդները կը փոխւին, սակայն խորհրդանիշերը կը մնան յաւիտենական: Վա՜յ այն ազգին, որ պատմութեան փոշիներուն տակ կը պահէ իր խորհրդանիշերը: Վա՜յ այն սերունդներուն, որոնք մոռացութեան կը դատապարտեն իրենց ազգային խորհրդանիշերը…:

Կապրինք անորոշ պայմաններու մէջ: Տագնապներով շրջապատուած ենք Հայաստանի թէ Սփիւռքի մէջ: Բեւեռացումները ներքնապէս կը մաշեցնեն մեր կենսունակութիւնը: Մութ ամպրերով ծածկւած է հայ կեանքի երկինքը:

Կարելի չէ լուռ ու անտարբեր մնալ մեր արմատներէն, արժէքներէն ու իդէալներէն մեզ հեռացնող ներկայ պայմաններուն դիմաց:

Կարելի չէ լուռ ու անտարբեր մնալ մեր կեանքը իմաստաւորած, մեր գոյապայքարը հզօրացուցած, մեր ինքնութիւնը իմաստաւորած խորհրդանիշերուն հանդէպ անտարբերութեան դիմաց:

Նայեցէք մեր պատմութեան:

Մեր ազգային կեանքի ճակատագրական պահերուն ու հայրենիքը դիմագրաւող վտանգներուն դիմաց, մեր ժողովուրդի զաւակները համախմբւած են ի խնդիր հայրենիքի փրկութեան: «Վասն հաւատոյ ու վասն հայրենեաց» սրբազան նշանաբանը սոսկ լոզունգ չէ եղած, այլ զօրաշարժի կոչ եւ պայքարի հրաւէր՝ Աւարայրէն մինչեւ Սարդարապատ եւ Արցախ:

Համախմբուիլ՝ ազգի ու հայրենիքի արժէքներուն ու իդէալներուն շուրջ. համախմբուիլ՝ հայրենիքի անկախութեան ամրապնդման եւ ազգին հզօրացման շուրջ:

Մնալ հաւատարի՛մ Մայիս 28-ի աւանդին ու պատգամին:

ԱՐԱՄ Ա ԿԱԹՈՂԻԿՈՍ

Մայիս 28, 2026

Անթիլիաս