Լոյս է տեսել ՀՅԴ պաշտոնաթերթ «Դրօշակ»-ի 2024 թ. 9-րդ համարը
Սեպտեմբերը մեր նորօրեայ պատմութեան մէջ նշանաւորւել է Հայաստանի եւ Արցախի պետականութիւնների հռչակման կարեւորագոյն իրադարձութիւններով: Դժբախտաբար Հայաստանի ներկայիս իշխանութիւնների օրօք մենք զրկւեցինք Արցախեան յաղթանակի հպարտառիթ տօնը նշելու հնարաւորութիւնից: Այնուամենայնիւ ազգային մտածողութեան տէր ուժերի, հասարակական խաւերի ու անհատների համար պատմական օրւայ նշումը ունի աւելի քան խորհրդանշական արժէք: Այն նաեւ իւրայատուկ ուղերձ է աշխարհին, որ ի տարբերութիւն դրածոյ իշխանութիւնների հայութեան համար այս խնդիրը փակւած չէ. եւ մեր արդար իրաւունքների համար պայքարը չի ընդհատւելու:
«Դրօշակ» պաշտօնաթերթի սեպտեմբերեան համարը նոյնպէս հիմնականում նւիրւած է Արցախին արցախահայութեանը, վերջիններիս շուրջ կատարւած եւ տեղի ունեցող գործընթացներին: Քաղաքագիտութեան եւ ազգային անվտանգութեան հարցերի մասնագէտ Արփի Աբրահամեանը հիմնւելով Արցախի անկախ պետականութեան կերտման իրաւաքաղաքական հիմքի վրայ, փաստում է, որ այդ հիմքը անխոցելի է եւ միջազգային իրաւունքի տեսանկիւնից արցախցիների ինքնորոշման իրաւունքի իրացումը արդարացւած է: Արցախցի լրագրող Տաթեւիկ Աղաջանեանի յօդւածը վերաբերում է այն դժւարութիւններին, որոնց բախւում են Հայաստան տեղափոխւած արցախահայերը՝ հիմնականում որպէս հետեւանք Հայաստանի իշխանութիւնների հակաարցախ քաղաքականութեան:
«Դրօշակ»-ի սոյն թւականի յուլիսի համարում յօդւածների հրապարակմամբ թերթն անդրադարձել էր ՀՅԴ Բիւրոյի Երիտասարդական գրասենեակի նախաձեռնութեամբ իրականացւած «Հայ Ուսանողութիւնը Արցախի համար» հետազօտութիւնների մրցոյթին: Սեպտեմբերեան համարում «Դրօշակ»-ը շարունակում եւ եզրակափակում է մրցոյթում յաղթած յօդւածների հրապարակումը համառօտ ներկայացնելով յաղթող երիտասարդներին: Խմբագրութիւնը սրանով իր աջակցութիւնն է յայտնում այս կարեւոր ձեռնարկմանը յուսալով, որ հետագայ մրցոյթներին նոյնպէս Արցախի ու Հայաստանի երիտասարդ քաղաքագէտները, վերլուծաբանները, ընկերաբանները եւ այլ մասնագէտներ նոյնքան պատասխանատւութեամբ եւ բծախնդրութեամբ կը ներգրաււեն՝ այն համոզմամբ, որ իրենց ուսումնասիրութիւնները հետաքրքրութիւն կը նարկայացնեն ոչ միայն հիմնահարցերով հետաքրքրւողների, այլեւ համապատասխան մասնագիտական շրջանակների համար: Որպէսզի նախաբան ծառայող այս խօսքից ընթերցողը պատկերացում կազմի, թէ խօսքը ինչ ուսումնասիրութիւնների մասին է տեղեկացնենք, որ Տաթեւիկ Դաւթեանը, Վահագն Խաչատրեանը եւ Ժաննա Վարդանեանը ներկայացրել են համապատասխանաբար հետեւեալ նիւթերի ամփոփագրերը «Արցախից բռնի տեղահանութեան ազդեցութիւնը Արցախի երեխաների իրաւունքների վրայ», «Ադրբեջանի կողմից իրականացւող մշակութային ցեղասպանութիւնը Արցախում» եւ «Զէնք՝ նաւթի դիմա՞ց, թէ՞ աւելին. Ադրբեջան-Իսրայէլ կապերի ներկան ու ապագան»:
Արցախի թեմայի ուղղակի շարունակութիւնը կարելի է համարել մոսկովեան վերլուծաբան Սարգիս Սարգսեանի ծաւալուն յօդւածը հետեւեալ խորագրով «44-օրեայ պատերազմի արիւնոտ դասերը»: Տեղական ու միջազգային հեղինակաւոր աղբիւրների հիման վրայ կազմւած հետազօտութիւնը, որը վերաբերում է անկախութեան հռչակումից ի վեր Հայաստանի եւ Ադրբեջանի ձեռք բերած զինատեսակներին, դրանց ձեռքբերման երկրներին, քանակին, ինչպէս եւ երկու երկրների եւ Արցախի ունեցած մարդկային եւ զինական կորուստներին 44-օրեայ պատերազմի ժամանակ: Աւելացնենք, որ հրապարակւող նիւթը ընդհանուր եւ բազմակողմանի ուսումնասիրութեան առաջին մասն է, իսկ միւսները կը ներկայացւեն յաջորդաբար:
Աւարտենք ներկայացնել «Դրօշակ»-ի նոր համարը վստահեցնելով ընթերցողին, որ սրանց կողքի համարում ներառւած են նաեւ հասարակական, բնապահպանական ու այլ բնոյթի հետաքրքրական ուրիշ նիւթեր եւս:
«Դրօշակ»-ի 2024 թ. 9-րդ համարը համացանցում կարող էք գտնել droshak.am հասցէի ներքոյ:
«Դրօշակ» թիւ 9, 2024 թ.
