Հայոց Առաքելական Եկեղեցու դէմ հերթական արշաւանքի ֆոնին, ականատեսը եղանք արդէն քանիցս կրկնւող ոստիկանական ուժերի մի այլ վայրագութեան, այս անգամ հայրենի երկրորդ քաղաք՝ Գիւմրիում։
Քաղաքաբնակները հարիւրաւոր զոռբա-զօրայիններին անւանեցին թուրք, երեւի վերջնի խուժանային պահւացքին ի տես…։
Զաւեշտը, սակայն, այս ամենում, մեծաթիւ «Ասկեարներով» ընդամէնը մէկ քաղաքացու, այն էլ՝ «կոռումպացւա՜ծ» դասւած քաղաքապետին ձերբակալելն ու բերման ենթարկելն էր…։
-Ինչո՞ւ այդ վայրենութիւնը,
-Ինչո՞ւ դահիճների նման ծածկւած դէմքերով գրոհայիններ՝ սեփական ժողովրդի դէմ,
-Ինչո՞ւ սեւ ու կարմիր բերետաւորների շարասիւներ՝ արժանապատիւ-իրաւատէր քաղաքացու դէմ…։
Պատասխանը պարզորոշ է. վախւորած իշխանութիւնը սարսափազդու մթնոլորտը տիրական դարձնելով՝ ուզում է պահել նոյն իշխանութիւնը…։ Եւ ի զուր չէ, որ բեզարած ժողովրդի վերջին կարգախօսքերում ակնբախ է «Ոչ՝ նիկոլի տեռորին» լոզունգը…։
Հապա՜, ո՞ւր են ժողովրդավա՜ր, խաղաղասէ՜ր ԱՄՆ-ի, անգլոսաքսոնների ու Եւրոմիութեան դեսպանները…։ Սրանք հո վերջին տարիներին յաճախադէպ են «մոնիտորինգի» ենթարկում ՀՀ սահմանային (յատկապէս հարաւային) շրջանները. թող մի անգամ էլ «մոնիտորինգի» ենթարկեն Երեւանի ու Գիւմրիի քաղաքներում իրենց այդքան փայփայած իշխանաւորների «մարդու իրաւունքի ու ժողովրդավարութեան» ցուցանիշները…, յար եւ նման այն ժամանակների, երբ ընդամէնը երկու-երեք դժգոհ ակտիւիստի նկարներն էին հրապարակում՝ կառավարութեան շէնքի առջեւ ցոյցի պահին… հետն էլ՝ օրւայ ոստիկանութեանը զգուշացնո՜ւմ՝ բռնի քայլերից խուսափելու համար…։ Ո՞ւր էք դուք՝ ով մարդկային արդարութեան պատուհասներ…, որ երբեւէ չեն ջնջւելու ՍԻԱՄԱՆԹՕ-ական նզովքներով դաջւած ձեր լպիրշ դէմքերը։
Ի տես այս վերջին հանգամանքին յատկապէս , իշխանութիւնները աւելի լկտիացած՝ շարունակելու են վայրի տեռորի մթնոլորտի պահպանման մարտավարութեամբ՝ վերահսկել ժողովրդի ընդդիմադիր կեցւածքները, ընդհուպ մինչեւ 2026-ի պարլամենտական հաստատապէս ուրւագծւած -նախանշւած ընտրութիւնները։ Այսինքն՝ մանաւանդ յետընտրական կեղծարարութիւնների դէմ բողոքի դուրս եկած ժողովրդի ընդվզումն փշրելու ամէն կարգի արտօնութիւն է տրւած իշխանութիւններին…։ Չէ՞ որ յաչս նոյն «ազատախո՜հ» արեւմուտքի ու յատկապէս՝ հարեւան ադրբեջանա-թուրքական դաշինքի՝ կարելի է արդէն «հայ ազգայնական ու ռեւանշիստ» ուժերին ամէն կերպ սաստել-ճնշել՝ «յանուն Թրամփեան խաղաղութեան»…։
Յարգելի ընթերցող, մինչեւ վերջ վատատես ու անյոյս մնալուն հակւած չենք. նաեւ հաւատում ենք հայաշխարհի արթնամտութեանը, ի հեճուկս անցնող 7 տարիներում հայրենադաւ ու ազգակործան պատուհասների նկրտրտումների։ Յատկապէս, երբ արժանապատիւ հայորդիք համախմբւում են ԱԶԳԱՅԻՆ ու ՀՈԳԵՒՈՐ պետականապահպան համահայկական նշանակութեան կառոյցների ու միաւորների շուրջ։
* * *
Ահաւասիկ.
ԱԶԳ-ՀԱՅՐԵՆԻՔ-ՊԵՏԱԿԱՆՈՒԹԻՒՆ-ը անխաթար պահելու եւ կարեւորը՝ վերազօրեղացնելու բարոյական բարձրագոյն պարտաւորութեան ենք կոչւած ազգովի՝ հայրենիքում, թէ՝ սփիւռք-արտերկրում։
Տայ Աստւած՝ արժանի լինենք այդ կոչմանը…։
Դ. Մ.
Պատմական գիտութիւնների թեկնածու
