Բակտերիաների՝ դեղերին դիմադրութիւնը մեծացել է, դա համաշխարհային սպառնալիք է
Առողջապահութեան Համաշխարհային կազմակերպութեան (ԱՀԿ) հրապարակւած զեկոյցում ասւում է, որ որոշ բակտերիաներում դեղերի դիմադրութիւնն աճել է՝ 2017 թւականին հետազօտութիւնների մեկնարկից ի վեր՝ նւազեցնելով շատ հակաբիոտիկների արդիւնաւէտութիւնը եւ սպառնալով ժամանակակից բժշկութեան առաջընթացին:
«2017 թւականին առաջնահերթ բակտերիալ պաթոգենների առաջին ցուցակի հրապարակումից ի վեր հակամանրէային դիմադրութեան (AMR) վտանգը մեծացել է, ինչը խաթարում է շատ հակաբիոտիկների արդիւնաւէտութիւնը եւ սպառնում ժամանակակից բժշկութեան բազմաթիւ առաջընթացներին», – ասաց Իւկիկոն, ԱՀԿ-ի հակամանրէային գծով գլխաւոր տնօրէնի տեղակալը:
Զեկոյցում աւելացւում է, որ կարեւոր պաթոգենները, ինչպէս հակաբիոտիկներին դիմացկուն գրամ-բացասական բակտերիաները եւ Mycobacterium tuberculosis, որը դիմացկուն է հակաբիոտիկ ռիֆամպիցինին, լուրջ գլոբալ վտանգ են ներկայացնում իրենց մեծ ծանրաբեռնւածութեան եւ բուժմանը դիմակայելու եւ այլ բակտերիաների նկատմամբ դիմադրութին տարածելու ունակութեան պատճառով:
«Բարձր առաջնահերթ պաթոգենները, ինչպէս սալմոնելլան եւ շիգելլան, յատկապէս տարածւած են ցածր եւ միջին եկամուտ ունեցող երկրներում, մինչդեռ Pseudomonas aeruginosa-ն եւ Staphylococcus aureus-ը լուրջ խնդիրներ են ստեղծում առողջապահական հաստատութիւններում»,- ասում է ԱՀԿ-ն:
Ընդհանուր առմամբ, հրապարակւած ցանկը ներառում է 23 պաթոգեն, որոնք տարբեր մակարդակներում դեղերի նկատմամբ կայուն են։
Ապրիլին կազմակերպութեան յայտարարութեան մէջ ասւում էր, որ COVID-19-ով հոսպիտալացւած հիւանդների աւելի քան 75%-ը ստացել է հակաբիոտիկներ, մինչդեռ դրանց կարիքը միայն 8%-ն է, ինչը կարող է սրել հակամանրէային դիմադրութեան տարածումը:
