Կանաչութեանը պարզապէս նայելը կարող է ամրապնդել հոգեկան առողջութիւնը

Աւելի ակնյայտ է դառնում այն, որ բնութեան մէջ գտնւելը կարող է օգուտ բերել մեր հոգեկան առողջութեանը եւ բարեկեցութեանը։ Բայց նոր հետազօտութիւնը, որն իրականացրել են գիտնական Վիթնի Ֆլեմինգը եւ նրա գործընկերները, ցոյց է տալիս, որ պարտադիր չէ լինել բնութեան մէջ՝ օգտակարութեան պտուղները քաղելու համար։

Բնական տարրերին պարզապէս հայեացք նետելը, անգամ քաղաքի կենտրոնում, կարող է բարելաւել ինքնազգացողութիւնը։

People and Nature ամսագրում հրապարակւած յօդւածում օգտագործւել է հայեացքին հետեւելու տեխնոլոգիան՝ հետազօտելու համար, թէ ինչպէս է ուշադրութեան կենտրոնացումը բնական տարրերի վրայ՝ արհեստականների համեմատ, ազդում հոգեկան առողջութեան վրայ։

Հետազօտական խումբը հետազօտութեան համար հաւաքել է 117 չափահաս մարդկանց։ Մասնակիցները պատահական կերպով բաշխւել են երեք խմբերից մէկում. մէկը կենտրոնացել է բնական տարրերի վրայ, ինչպիսին են ծառերը (կանաչ խումբ), միւսը՝ արհեստական տարրերի, ինչպիսին են շէնքերը (գորշ խումբ), եւ երրորդը, որը կենտրոնացել է մէկի եւ միւսի համադրման վրայ (խառը խումբ)։ Քաղաքում ուղեկցորդի հետ միասին 45 րոպէանոց զբօսանքի ժամանակ իւրաքանչիւր մասնակից հագել է յատուկ ակնոցներ աչքերին հետեւելու համար։ Երթուղին ներառել է տասը յատուկ առանձնացւած վայրեր կանգառի համար, որպէսզի ընդգծւեն բնական կամ ձեռակերտ տարրերը՝ կախւած խմբից։

Զբօսանքից առաջ եւ յետոյ մասնակիցները ենթարկւել են հարցման, որի ընթացքում գնահատել են իրենց տրամադրութիւնը, տագնապայնութեան մակարդակը եւ զբօսանքի վերականգնողական յատկութիւնները։

Ակնոցները ֆիքսել են, թէ ուր են նայել մասնակիցները զբօսանքի ընթացքում, ինչը թոյլ է տւել հետազօտողներին քանակապէս գնահատել ժամանակի քանակը, որը ծախսւել է կանաչ (բնական) կամ գորշ (արհեստական) տարրերի վրայ ուշադրութեան կենտրոնացման վրայ։ Փաստօրէն, գիտնականների մեթոդիկան թոյլ է տւել ստոյգ եւ օբիեկտիւօրէն գնահատել վիզուալ ներգրաււածութիւնը՝ ամրապնդելով կապը բնութեան մէջ գտնւելու եւ ինքնազգացողութեան բարելաւման միջեւ:

Տւեալները հաստատել են, որ իւրաքանչիւր խումբ իսկապէս աւելի շատ ժամանակ է անցկացրել՝ դիտելով բնանկարները, որոնց վրա նրանց խնդրել են կենտրոնանալ։ Արդիւնքները ցնցող էին։

Մասնակիցները, որոնք աւելի շատ ուշադրութիւն էին յատկացրել կանաչ տարրերին, տեղեկացրել են տրամադրութեան զգալի բարձրացման եւ տագնապայնութեան նւազման մասին նրանց համեմատ, ովքեր աւելի շատ ուշադրութիւն էին յատկացրել գորշ տարրերին։

Զբօսանքից յետոյ նրանք ցուցադրել են դրական յոյզերի աւելի բարձր եւ անհանգստութեան աւելի ցածր մակարդակ։ Նրանք նաեւ տեղեկացրել են, որ իրենց աւելի հանգստացած եւ երիտասարդացած են զգում։

NEWS.am Medicine