10 րոպէանոց զբօսանքները բնութեան գրկում թեթեւացնում են անհանգստութիւնն ու դեպրեսիան
Իւտայի համալսարանի սոցիալական աշխատանքի կոլէջի գիտնականները պարզել են, որ բնութեան գրկում տասը րոպէ քայլելը նւազեցնում է դեպրեսիայի եւ անհանգստութեան ախտանիշները եւ բարելաւում տրամադրութիւնն ու կեանքի որակը: Հետազօտութեան արդիւնքները հրապարակւել են Ecopsychology ամսագրում։
Նոր աշխատանքը հիմնւած է հոգեկան հիւանդութեամբ տառապող մեծահասակների բնութեան մէջ ժամանակ անցկացնելու առողջութեան վրայ ունեցած ազդեցութիւնների վրայ: Գիտական ստուգատեսը ներառում էր աւելի քան 40 աշխատութիւն՝ լրացուցիչ հեղինակային մեկնաբանութիւններով: Վերանայւած ուսումնասիրութիւններին, ընդհանուր առմամբ, մասնակցել է 1492 մարդ:
Արդիւնքները ցոյց են տւել, որ նոյնիսկ կանաչ տարածքներում բացօթեայ տասը րոպէ զբօսնելը զգալի դրական ազդեցութիւն է ունեցել հոգեկան հիւանդութեան ախտանիշների վրայ (դեպրեսիա եւ անհանգստութիւն), բարելաւել ճանաչողութիւնը եւ յուզական կարգաւորումը, ինչպէս նաեւ բարելաւել տրամադրութիւնն ու կեանքի որակը:
Հետազօտողները աւելացրել են, որ օգտակար ազդեցութիւնները մի փոքր տարբերւում են՝ կախւած բացօթեայ գործունէութեան տեսակից (օրինակ՝ քայլել, վազել, այգեգործութիւն, ջրային վարժութիւններ): Բացի այդ, վերլուծութիւնը չի յայտնաբերել շրջակայ միջավայրի շարունակական եւ միջակայքային ազդեցութեան տարբերութիւններ: Գիտնականները բացատրել են, որ զբօսանքի երկու տեսակներն էլ ունեն զգալի դրական (եւ նաեւ արագ) ազդեցութիւն:
