Արդեօ՞ք փայլաթիթեղից գլխարկները կարող են պաշտպանել մագնիսական փոթորիկներից
«ԱԼԻՔ» – Վերջին մագնիսական փոթորիկը բազմաթիւ մարդկանց մօտ առաջացրել է գլխացաւեր, թուլութիւն, նոյնիսկ գիտակցութեան կորուստ, ինչպէս նաեւ խափանումներ տեխնիկայի աշխատանքում։ Սա կրկին առաջ է բերել հարցը՝ արդեօ՞ք հնարաւոր է պաշտպանւել տիեզերական եղանակի ազդեցութիւնից։ Որոշ մարդիկ կարծում են, որ փայլաթիթեղից գլխարկը կարող է օգնել, սակայն գիտնականները կտրականապէս հերքում են այս միտքը։
Ինչո՞ւ է փայլաթիթեղից գլխարկը անարդիւնաւէտ
Յայտնի հնարագործ Եւգենի Ռոդիմինը պնդում է, որ նման գլխարկները կարող են պաշտպանել մագնիսական փոթորիկներից եւ կենցաղային ճառագայթումից, սակայն նրա յայտարարութիւնները գիտական հիմնաւորում չունեն։ Գիտական լրագրող Ալեքսանդր Սերգէյեւի խօսքով՝ այսպիսի գաղափարները կապւած են էզոտերիկ հաւատալիքների եւ կեղծ գիտութեան հետ։
Ռուսաստանի ԳԱԱ Տիեզերական հետազօտութիւնների ինստիտուտի փորձագէտ Սերգէյ Բոգաչեւը բացատրում է, որ մետաղները, իրօք, կարող են արգելափակել որոշ էլեկտրամագնիսական ալիքներ, օրինակ՝ ռադիոալիքներ կամ բջջային հեռախօսների ճառագայթում։ Սակայն մագնիսական դաշտերը մետաղով հնարաւոր չէ արգելափակել, այդ պատճառով փայլաթիթեղով պատւած գլխարկները ոչ մի պաշտպանական ազդեցութիւն չեն ունենում։
Ի՞նչ իրական մեթոդներ կարող են օգնել
Որոշ բլոգերներ, օրինակ՝ ամերիկուհի Դենիզ Դրայդէնը, մագնիսական փոթորիկները կապում են առողջական խնդիրների հետ եւ առաջարկում են այլընտրանքային մեթոդներ, ինչպիսիք են մեդիտացիան, հանգիստը եւ «հողակցումը» (բոբիկ քայլելը գետնի վրայ)։
Իսկ նեարդաբան Զագիդաթ Կոնովալովան խորհուրդ է տալիս բոտոքսի ներարկումներ, որոնք կարող են նւազեցնել մագնիսական փոթորիկների հետեւանքով առաջացած գլխացաւերը։ Այս մեթոդն արդէն կիրառւում է միգրենների բուժման համար, սակայն դեռեւս պահանջում է լրացուցիչ հետազօտութիւններ։
Այսպիսով, փայլաթիթեղից գլխարկը պարզապէս միֆ է, իսկ մագնիսական փոթորիկներից պաշտպանւելու իրական մեթոդները պահանջում են կամ օրգանիզմի յարմարում, կամ ապացուցւած բժշկական միջոցների կիրառում։
