Ճարպակալումը սերտօրէն կապւած է առողջութեան համար 16 ծանր հետեւանքների հետ

Հետազօտութիւնը, որն իրականացւել է Ջոն Հոփքինսի համալսարանի ղեկավարութեամբ, ցոյց է տւել, որ ճարպակալումը, յատկապէս ծանրը, սերտօրէն կապւած է առողջութեան համար ընդհանուր 16 հետեւանքների հետ։

Մասնաւորապէս, նկատւել է ուժեղ կապ քնի մէջ օբստրուկտիւ ափնոէի, 2-րդ տեսակի շաքարային դիաբետի եւ մետաբոլիկ դիսֆունկցիայի հետ կապւած լեարդի ստեատոզի միջեւ։

Հետազօտութիւնում, որի արդիւնքները հրապարակւել են NEJM Evidence ամսագրում, գիտնականները փորձել են հասկանալ, թէ ինչպէս են ճարպակալման տարբեր մակարդակները կապւած առողջական վիճակի լայն սպեկտրի հետ ԱՄՆ բնակչութեան տարբեր շերտերի միջեւ։ Ուսումնասիրւել են Հետազօտական ծրագրի All of Us (գործարկւել է 2018 թ.) 270657 մասնակիցների տւեալները։

Մասնակիցները ներկայացրել են էլեկտրոնային բժշկական քարտեր, ֆիզիկական չափումների արդիւնքները եւ հարցման տւեալները։ Գրանցման ժամանակ հաշւի է առնւել մարմնի զանգւածի ինդեքսը (ՄԶԻ), որն օգտագործւել է մարդկանց դասակարգման համար՝ նորմալ քաշ ունեցող, աւելորդ քաշ կամ ճարպակալում ունեցող մարդկանց՝ հետագայում I, II եւ III մակարդակի ճարպակալումները դասակարգելու համար։

Գնահատւել են 16 առողջական վիճակներ՝ հիպերտոնիա, 2-րդ տեսակի շաքարային դիաբետ, հիպերլիպիդեմիա կամ դիսլիպիդեմիա, սրտային անբաւարարութիւն, նախասրտերի ֆիբրիլիացիա, աթերոսկլերոտիկ սիրտ-անօթային հիւանդութիւններ, երիկամների քրոնիկական հիւանդութիւններ, թոքի զարկերակի թրոմբոէմբոլիա, խոր երակների թրոմբոզ, յոդացաւ, լեարդի հիւանդութիւններ՝ կապւած նիւթափոխանակութեան խանգարումների հետ, քարերի գոյացում լեղուղիներում, քնի մէջ օբստրուկտիւ ափնոէ, ասթմա, գաստրոէզոֆագելային ռեֆլիւքս եւ օսթեոարթրիտ։

Ճարպակալում ունեցել է հետազօտւած հասարակութեան 42,4 տոկոսը, այդ թւում 21,2 տոկոսը՝ 1-ին դասի ճարպակալում, 11,3 տոկոսը՝ 2-րդ եւ 9,8 տոկոսը՝ 3-րդ։ Տարածւածութեան եւ հիւանդացութեան ցուցանիշներն աստիճանաբար աւելացել են ճարպակալման դասի բարձրացման հետ՝ առողջութեան համար 16 ցուցանիշների գծով։ 3-րդ աստիճանի ճարպակալման հետ նկատւող կապն առաւել արտայայտւած է եղել քնի մէջ օբստրուկտիւ ափնոէի, 2-րդ տեսակի դիաբետի եւ մետաբոլիկ դիսֆունկցիայի հետ կապւած լեարդի հիւանդութիւնների ժամանակ։ Աւելի թոյլ կապ յայտնաբերւել է ասթմայի, օսթէոարթրիտի եւ աթերոսկլերոտիկ սիրտ-անօթային հիւանդութիւնների ժամանակ։

Պարզւել է, որ ճարպակալումը բացատրում է քնի մէջ օբստրուկտիւ ափնոէի դէպքերի 51,5 տոկոսը եւ լեարդի մետաբոլիկ հիւանդութիւնների դէպքերի 36,3 տոկոսը, իսկ օսթէոարթրիտի բոլոր դէպքերի 14,0 տոկոսը հետազօտւող հասարակութեան մէջ, ըստ գնահատականների, կապւած է եղել ճարպակալման հետ։

Բարձր ռիսկը, յատկապէս ծանրութեան աւելի բարձր աստիճաններում, կապւած է եղել առողջութեան համար հետազօտւող բոլոր 16 հետեւանքների հետ։

News.am