Շոգը նւազեցնում է երեխաների դատողական ունակութիւնը

Բարձր ջերմաստիճանների կրկնակի ազդեցութիւնը բացասաբար է անդրադառնում երեխաների ուսանելու ունակութեան վրայ, յատկապէս մաթեմատիկայի ոլորտում: Այս եզրակացութեանն են հանգել RMIT-ի եւ Նոր Հարաւային Ուելսի համալսարանի աւստրալիացի հետազօտողները: Ուսումնասիրութեան արդիւնքները հրապարակւել են PLOS Climate ամսագրում:

Գիտական ​​վերլուծութիւնը ներառել է 61 երկրներից գրեթէ 14.5 միլիոն դպրոցականների տւեալներ: Վերլուծութիւնը ցոյց է տւել, որ տաք կլիմայում ապրող եւ սովորող երեխաները աւելի վատ են կատարում տրամաբանութիւն, վերացական մտածողութիւն եւ կենտրոնացում պահանջող առաջադրանքներ: Նման հմտութիւնները ակտիւօրէն օգտագործւում են մաթեմատիկայի դասերում: Միեւնոյն ժամանակ, կարդալու եւ աւելի պարզ առաջադրանքներ կատարելու ունակութիւնը աւելի քիչ է տուժել:

Ցածր եկամուտ ունեցող ընտանիքների աշակերտները ամենախոցելի են եղել շոգի նկատմամբ: Նրանք աւելի յաճախ յաճախել են դպրոցներ, որտեղ օդորակիչ չկար եւ չեն ունեցել լրացուցիչ դասընթացների հնարաւորութիւն իրենց գիտելիքները ամրապնդելու համար: Արդիւնքում, հէնց այս խումբ աշակերտներն են ցուցաբերել ճանաչողական կարողութիւնների ամենամեծ անկումը:

Գիտնականների կարծիքով, երկարաժամկէտ հեռանկարում դա կարող է յանգեցնել երիտասարդների միջեւ կրթական բացի մեծացմանը: Հետազօտողները նաեւ նշել են, որ անպատշաճ պայմաններում սովորելը կարող է դանդաղեցնել ամբողջ սերունդների մտաւոր զարգացումը եւ մեծացնել սոցիալական անհաւասարութիւնը:

Ուսումնասիրութեան հեղինակները կոչ են անում կրթական քաղաքականութեան մէջ հաշւի առնել կլիմայական գործօնները: Հնարաւոր լուծումների թւում են դպրոցների սառեցման համակարգերի արդիականացումը եւ գլոբալ տաքացման համատեքստում կրթական գործընթացը կազմակերպելու մօտեցումների վերանայումը:

News.am