Գիտնականները պարզել են, թէ ինչպէս է սնունդը ազդում 50-ից բարձր տարիքի մարդկանց երջանկութեան զգացողութեան վրայ

Մեծ Բրիտանիայում անցկացւած նոր խոշոր ուսումնասիրութիւնը ցոյց է տւել, որ սննդանիւթերով հարուստ դիետան կարող է բարձրացնել երջանկութեան եւ կեանքի իմաստի զգացումը տարեց հասակում, սակայն դրա ազդեցութիւնը սերտօրէն կապւած է տրամադրութեան, առողջական վիճակի եւ եկամտի մակարդակի հետ։

Հետազօտութեան արդիւնքները հրապարակւել են «British Journal of Health Psychology» ամսագրում։

Գիտնականները վերլուծել են, թէ արդեօք 50 տարեկանից բարձր մարդիկ աւելի շատ ձուկ, բանջարեղէն, մրգեր եւ առողջարար ճարպեր են օգտագործում եւ պարզել են, որ այսպէս սնւողները, միջին հաշւով, աւելի երջանիկ են եւ կեանքից աւելի գոհ։ Այնուամենայնիւ, ապացոյցները դեռեւս համոզիչ չեն եւ անհրաժեշտ են աւելի մանրակրկիտ երկայնական ուսումնասիրութիւններ։

Օգտագործւել են Անգլիայի ծերացման լոնգիտուդինալ հետազօտութեան (ELSA) տւեալները, որն ընդգրկել է 50-ից բարձր տարիքի մարդկանց։ Դիետան գնահատւել է 24-ժամեայ հարցման հիման վրայ՝ երկու պատահական օր։ Հոգեբանական բարեկեցութիւնը չափւել է երեք պարամետրերով՝ անձնական իմաստի եւ աճի զգացողութիւն, տւեալ պահին երջանկութիւն եւ կեանքից բաւարարւածութիւն։ Վերլուծութեան ժամանակ հաշւի են առնւել տարիքը, սեռը, էթնիկ պատկանելութիւնը, առողջական վիճակը, եկամուտները, կրթութիւնը, միայնութիւնը, քրոնիկ հիւանդութիւնները եւ դեպրեսիւ ախտանիշները։

Նմուշի միջին տարիքը կազմել է մոտաւորապէս 69 տարեկան եւ մասնակիցների կէսից մի փոքր աւելին կանայք են եղել: Մեծ մասը օրական կերել է մոտաւորապէս երկու բաժին միրգ եւ բանջարեղէն, ինչը զգալիօրէն ցածր է խորհուրդ տրւող հինգ բաժնից: Բազմաչհագեցած ճարպերը ապահովել են օրական էներգիայի մոտաւորապէս 2.5%-ը՝ նոյնպէս զգալիօրէն ցածր խորհուրդ տրւող մակարդակից: Մասնակիցների կէսից աւելին հարցման օրերին ձուկ չէր ուտում:

Հետազօտութեան արդիւնքները ցոյց են տւել, որ մրգերի եւ բանջարեղէնի օգտագործումը կայուն կապ ունի կեանքի իմաստի եւ անձնային աճի զգացողութեան հետ՝ նոյնիսկ դեպրեսիան հաշւի առնելուց յետոյ։ Սակայն երջանկութեան եւ կեանքից ընդհանուր բաւարարւածութեան զգացումների հետ կապն աւելի թոյլ էր, եթէ հաշւի էին առնւում դեպրեսիւ ախտանիշները եւ քրոնիկ հիւանդութիւնները։ Ձուկը միակ մթերքն էր, որի օգտագործումը բոլոր ճշգրտումներից յետոյ մշտապէս կապւած էր երջանկութեան զգացողութեան հետ։

Հեղինակներն ընդգծում են, որ դիետան փոփոխւող գործօն է եւ մրգերի, բանջարեղէնի եւ ձկան օգտագործման աւելացումը կարող է պարզ եւ մատչելի ռազմավարութիւն լինել տարեց մարդկանց մօտ հոգեբանական բարեկեցութիւնը բարելաւելու համար։ Այնուամենայնիւ, հետազօտութեան բնոյթի (միայն մէկ պահի ուսումնասիրութիւն, ոչ թէ երկարատեւ դիտարկում), ինչպէս նաեւ ինքնահաշւետւութեան մեթոդների եւ յիշողութեան հնարաւոր սխալի պատճառով, հնարաւոր չէ վստահօրէն ասել, որ հենց սնունդն է բարեկեցութեան բարելաւման պատճառ։

 News.am