Արագ քայլելը նւազեցնում է քաղցկեղի առաջացման ռիսկը

Հոնկոնգի համալսարանի բժշկական ֆակուլտետի (HKUMed) դեղագիտութեան եւ դեղագիտութեան ամբիոնի գիտահետազօտական խումբը նորարարական հետազօտութիւն է անցկացրել, որը կապ է յայտնաբերել քայլելու արագութեան եւ քաղցկեղի առաջացման ռիսկի միջեւ,- հաղորդում է Euronews-ը։

Հետազօտողները պարզել են, որ աւելի արագ քայլող մարդիկ զգալիօրէն ցածր են ունեցել քաղցկեղի, մասնաւորապէս՝ թոքերի քաղցկեղի առաջացման ընդհանուր ռիսկը։ Այդ կապը պահպանւել է՝ անկախ նրանից, թէ քայլելու արագութիւնը չափւել է ինքնուրոյն, թէ օբիեկտիւօրէն։

Մեծածաւալ հետազօտութիւնը վերլուծել է Մեծ Բրիտանիայի կենսաբանկ նախագծի աւելի քան 430 հազար մասնակիցների տւեալները, եւ արդիւնքները հաստատւել են Հոնկոնգում անցկացւած ուսումնասիրութեան մէջ։ Ստացւած արդիւնքները վկայում են, որ քայլելու «որակը», մասնաւորապէս՝ արագութիւնը, կարող է աւելի պաշտպանիչ ազդեցութիւն ունենալ, քան քայլելու «քանակը»։

Քայլելու արագութիւնը կարող է լինել քաղցկեղի առաջացման ռիսկի պարզ ցուցիչ, որը կարող է օգնել մշակել անհատականացւած քաղցկեղի կանխարգելման ռազմավարութիւններ։ Հետազօտութիւնը հրապարակւել է Wasting and Osteoporosis բժշկագիտական  հանդէսում:

Քաղցկեղը մնում է մահւան առաջատար պատճառ ամբողջ աշխարհում, տարեկան ախտորոշւում է մօտ 20 միլիոն նոր դէպք։ Ամերիկեան քաղցկեղի ընկերութեան ներկայիս ուղեցոյցները քաղցկեղի կանխարգելման համար խորհուրդ են տալիս կանոնաւոր ֆիզիկական ակտիւութիւն եւ մկանների ամրապնդման վարժութիւններ, իսկ քայլելը, որպէս ֆիզիկական ակտիւութեան ամենատարածւած եւ հեշտութեամբ հասանելի ձեւ, դարձել է առողջութեան խթանման հիմնական ուշադրութեան կենտրոնում։

Նախորդ հետազօտութիւնները հիմնականում ուսումնասիրել են քայլելու տեւողութեան եւ յաճախականութեան, քաղցկեղի հիւանդացութեան եւ մահացութեան միջեւ եղած փոխադրաձ կապը։ Սակայն քայլելու արագութիւնը, որը յաճախ համարւում է ընդհանուր առողջութեան կարեւոր ցուցանիշ, քաղցկեղի հետազօտութիւններում պատշաճ ուշադրութեան չի արժանացել։

Ըստ Հոնկոնգի բժշկական համալսարանի դեղագիտութեան եւ դեղագիտութեան ամբիոնի դոցենտ, պրոֆեսոր Չժոնգ Ցզին Լիւնգի՝ քայլելու արագութիւնը ֆիզիկական գործառոյթի արագ եւ յուսալի ցուցանիշ է եւ առնչւում է տարիքային հիւանդութիւնների, մասնաւորապէս՝ սրտանօթային հիւանդութիւններին եւ դեմենցիային, ինչպէս նաեւ մահացութեանը։

Վերջին հետազօտութիւնները ցոյց են տալիս, որ կմախքային մկանները դեր են խաղում բորբոքային եւ նիւթափոխանակութեան գործընթացների կարգաւորման գործում, ինչը կարող է օգնել պարզել քայլելու արագութեան եւ քաղցկեղի ռիսկի միջեւ կենսաբանական կապը։

News.am