Գէնային թերապիան 64%-ով նւազեցրել է դիաբետով երիկամային հիւանդութեան ռիսկը

Գէնային թերապիայի նոր մօտեցումը խոստումնալից արդիւնքներ է ցոյց տւել 1-ին տիպի շաքարախտով հիւանդների մօտ՝ երիկամային հիւանդութիւնների կանխարգելման գործում։

1-ին տիպի շաքարախտով տառապող իւրաքանչիւր երրորդ մարդու մօտ ի վերջոյ երիկամների վնասւածք է առաջանում, որը յաճախ զարգանում է առանց ախտանիշների, մինչեւ ծանր դառնալը։ Բուժումները կարող են դանդաղեցնել առաջընթացը, բայց դրանք չեն լուծում խնդրի արմատը՝ գլոմերուլի՝ երիկամների հիմնական ֆիլտրի վնասւածքը։

Բրիստոլի համալսարանի գիտնականները, ում հետազօտութեան արդիւնքները հրապարակւել են Molecular Therapy ամսագրում, օգտագործել են անվնաս վիրուս՝ որպէս վեկտոր՝ VEGF-C գէնը անմիջապէս շաքարախտով մկների երիկամների բջիջներ մատակարարելու համար։ VEGF-C-ն սպիտակուց է, որը նպաստում է երիկամների ֆիլտրող կառուցւածքներում արեան անօթների առողջութեան պահպանմանը եւ նախկին հետազօտութիւններում արդէն պաշտպանիչ ազդեցութիւն է ցուցաբերել՝ երիկամների շաքարապտով վնասման վաղ փուլերում։

Փորձերը ցոյց տւեցին ալբումինուրիայի (միզուղիների ալբումինի արտազատում, որը երիկամների վնասւածքի մարկեր է) 64%-ով նւազում՝ համեմատած վերահսկիչ խմբի հետ, ինչը կրկնակի գերազանցում է Ամերիկեան շաքարախտի ասոցիացիայի կողմից քրոնիկ երիկամային հիւանդութիւնը դանդաղեցնելու համար խորհուրդ տրւող նւազագոյն չափը: Աւելին, թերապիան պաշտպանիչ ազդեցութիւն է ունեցել գլոմերուլիար կառուցւածքների վրայ՝ բարելաւելով երիկամների գործառոյթը:

Հեղինակները ընդգծում են, որ ներկայումս չկան դեղամիջոցներ, որոնք յատուկ մշակւած են 1-ին տիպի շաքարախտով մարդկանց երիկամները պաշտպանելու համար, չնայած երիկամային հիւանդութիւն զարգացնելու բարձր ռիսկին: Նրանք կարծում են, որ VEGF-C գենային թերապիան կարող է լրացնել այս բացը՝ առաջարկելով նպատակային եւ երկարատեւ միջամտութիւն:

News.am