Տղամարդիկ կանանցից կրկնակի շատ ֆիզիկական վարժութիւնների կարիք ունեն

Հետազօտողները պարզել են, որ կանայք կարող են տղամարդկանցից կրկնակի պակաս ֆիզիկական վարժութիւններ անել: Euronews-ը պարզել է, թէ շաբաթական ընդամէնը մի քանի ժամ ֆիզիկական վարժութիւններն ինչպէս կարող են պաշտպանել սիրտը, եւ ինչպէս է դա ազդում մահւան ռիսկի վրայ:

Չինացի հետազօտողների մի խումբ պարզել է, որ ֆիզիկական վարժութիւնները կանանց համար աւելի օգտակար են, քան տղամարդկանց, յատկապէս սրտի առողջութեան համար:

Շաբաթական մօտ չորս ժամ ֆիզիկական վարժութիւններ կատարող կանայք կարող են միջինում մէկ երրորդով նւազեցնել սրտի իշեմիկ հիւանդութեան (ՍԻՀ) զարգացման ռիսկը:

Սակայն տղամարդիկ կարիք ունեն կրկնակի աւելի ֆիզիկական ակտիւութեան՝ շաբաթական գրեթէ իննը ժամ:

Սրտի իշեմիկ հիւանդութեան (ՍԻՀ) դէպքում սրտի արեան անօթները նեղանում կամ կալցիֆիկացւում են: Արեան հոսքը սիրտ խաթարւում է: Ռիսկի գործօններից են անառողջ սննդակարգը, ֆիզիկական վարժութիւնների պակասը եւ ծխելը:

Ֆիզիկական վարժութիւնների դրական ազդեցութիւնը կարող է նկատելի լինել նոյնիսկ սահմանափակ ֆիզիկական վարժութիւնների դէպքում. շաբաթական երկու ժամը բաւարար է կանանց մօտ ՍԻՀ-ի ռիսկը 22 տոկոսով նւազեցնելու համար: Տղամարդկանց համար այս ցուցանիշը կազմում է 17 տոկոս:

Չինական հետազօտական խումբը նաեւ մի քանի խորհուրդ ունի երկարակեցութեան վերաբերեալ. նրանք, ովքեր պարբերաբար մարզւում են, զգալիօրէն նւազ ենթարկւած են մահւան ռիսկին: Ակտիւ կենսակերպ վարող կանանց մահւան ռիսկը 70 տոկոսով ցածր է: Տղամարդկանց համար այս ցուցանիշը 19 տոկոս է: Նոյն գոյատեւման մակարդակին հասնելու համար տղամարդիկ պէտք է 1.7 անգամ աւելի շատ մարզւեն, քան կանայք:

Ընդհանուր առմամբ, մարդը շաբաթական որքան շատ օրեր է ֆիզիկապէս ակտիւ, այնքան ցածր է սրտի իշեմիկ հիւանդութեան զարգացման ռիսկը, եւ սա վերաբերում է երկու սեռին էլ: Այնուամենայնիւ, նոյնիսկ այստեղ կանայք որոշ չափով աւելի շատ են օգուտ ստանում ամենօրեայ մարզումներից:

Կանանց կենսաբանական առաւելութիւնը կարող է կապւած լինել հորմոնների եւ մկանների կառուցւածքի հետ: Էստրոգեն հորմոնները նպաստում են կանանց օրգանիզմում ճարպի այրմանն ու նաեւ պաշտպանիչ ազդեցութիւն ունեն արեան անոթների վրայ:

Բացի դրանից, կանայք ունեն աւելի շատ «դիմակայունութեան վրայ կենտրոնացած մկանային մանրաթելեր»: Տղամարդիկ հակւած են ունենալու աւելի շատ «արագութեան ուժի մանրաթելեր»: Հէնց սա էլ բացատրում է, թէ ինչու են կանանց սրտերն աւելի առողջ դառնում աւելի քիչ մարզումների դէպքում:

News.am