Պարանոցի քրոնիկ ցաւը 19%-ով մեծացնում է հիպերտոնիայի զարգացման ռիսկը

Գլազգոյի համալսարանի գիտնականները պարզել են, որ մարմնի տարբեր մասերում առկայ քրոնիկական ցաւը զգալիօրէն մեծացնում է մեծահասակների մօտ արեան ճնշման բարձրացման հաւանականութիւնը։ Հետազօտութեան արդիւնքները հրապարակւել են Hypertension ամսագրում։

Գիտնականները նման եզրայանգման են եկել՝ վերլուծելով քրոնիկական ցաւ ունեցող ԱՄՆ-ի շուրջ 200 հազար փորձարկւողների առողջական տւեալները։ Մասնակիցները նշել են ցաւի տեղակայումը (լոկալիզացիան), դրա տեւողութիւնը եւ առօրեայ ակտիւութեան վրայ ազդեցութիւնը։ Հետազօտութեան մէջ ընդգրկւելու համար քրոնիկական ցաւը պէտք է տեւած լինէր առնւազն երեք ամիս։

Արդիւնքները ցոյց են տւել, որ քրոնիկ լոկալիզացւած ցաւը հիպերտոնիայի ռիսկը բարձրացնում էր 20%-ով, իսկ կարճատեւ ցաւը՝ 10%-ով։ Ընդ որում, որովայնի քրոնիկական ցաւը կապւած էր հիւանդութեան հաւանականութեան 43%-ով աւելացման հետ, գլխացաւը՝ 22%-ով, պարանոցի եւ ուսերի ցաւը՝ 19%-ով, իսկ ազդրի եւ մէջքի ցաւը՝ համապատասխանաբար 17%-ով եւ 16%-ով։

Ուսումնասիրութիւնը հաշւի է առել լրացուցիչ ռիսկի գործօններ, այդ թւում՝ բորբոքումը եւ դեպրեսիան: Բորբոքումը գնահատւել է արեան մէջ C-ռեակտիւ սպիտակուցի մակարդակով, իսկ դեպրեսիան՝ դեպրեսիւ տրամադրութիւնը, հետաքրքրութեան կորուստը, անհանգստութիւնը կամ անտարբերութիւնը գնահատող հարցաթերթիկների միջոցով: Այս գործօնների ազդեցութեանը չնայած, քրոնիկ ցաւի եւ բարձր արեան ճնշման միջեւ կապը պահպանւել է:

«Քրոնիկ ցաւ ունեցող մարդկանց օգնութիւն ցուցաբերելիս բուժաշխատողները պէտք է հաշւի առնեն հիպերտոնիայի բարձր ռիսկը, ինչպէս ուղղակիօրէն, այնպէս էլ անուղղակիօրէն։ Ցաւի վաղաժամ ճանաչումը կարող է նպաստել սրտանօթային բարդութիւնների ժամանակին ախտորոշմանը եւ բուժմանը»,- նշում է հետազօտութեան համահեղինակ, բժշկական գիտութիւնների դոկտոր Ջիլ Փելլը։

News.am