«ԱԼԻՔ» – Իսլ. յեղափոխութեան առաջնորդ այաթ. Սէյէդ Ալի Խամենէին երէկ՝ յուլիսի 3-ին հանդիպել է այաթ. Մոթահարի կրօնական բարձրագոյն դպրոցի տնօրինութեան եւ դասախօսական կազմի մի խումբ ներկայացուցիչների հետ:
Իր ելոյթում այաթ. Խամենէին յատուկ կարեւորել է նախագահական ընտրութիւնների երկրորդ փուլը՝ նշելով. «Այս ընտրութիւնները շատ կարեւոր են, եւ իւրաքանիւր ոք, ով հետաքրքրւած է իսլամով, Իսլամական Հանրապետութիւնով, երկրի առաջընթացով, իրավիճակի բարելաւմամբ եւ խնդիրների կարգաւորմամբ, պէտք է այդ հետաքրքրութիւնը ցուցաբերի՝ ուրբաթ օրը մասնակցելով ընտրութիւններին»:
Իսլ. յեղափոխութեան առաջնորդն ընտրութիւնների առաջին փուլի մասնակցութեան ցուցանիշն համարելով անբաւարար եւ սպասւածից պակաս, ասել է. «Այս երեւոյթն ունի պատճառներ, որոնք հետաքննւում են քաղաքական գործիչների եւ սոցիոլոգների կողմից»:
Նա 100 տոկոսով սխալ է անւանել որոշ մարդկանց կարծիքը, թէ ով չի մասնակցել ընտրութիւնների առաջին փուլին, դէմ է համակարգին.
«Ոմանց կարող է դուր չգալ որոշ պաշտօնեաներ կամ նոյնիսկ իսլամական համակարգը, եւ նրանք նոյնիսկ ազատօրէն բարձրաձայնում են այդ մասին, բայց այն տեսակէտը, թէ ով չի քւէրակել կապւած է այս մարդկանց եւ այս մտածելակերպի հետ, բոլորովին սխալ է»,- ասել է այաթ. Խամենէին:
Իսլ. յեղափոխութեան առաջնորդն ընտրութիւններին ժողովրդի մասնակցութիւնը համարելով համկարգի երաշխիքն ու հպարտութեան պատճառը՝ նշել է. «Որքան մասնակցութիւնն ակտիւ լինի, համակարգն աւելի մեծ հնարաւորութիւններ կունենայ հետապնդել երկրի ռազմավարական տրամաբանութեան շրջանակում սահմանւած նպատակների իրագործումը, ինչը շատ մեծ հնարաւորութիւն է»:
Վերջում նա յոյս է յատնել, որ Աստւած իմաստութիւն կը պարգեւի ժողովրդին՝ լաւագոյն ընտրութիւնը կատարելու համար, որպէսզի նորընտիր նախագահը կարողանայ իրականացնել համակարգի եւ ժողովրդի նպատակները:
