Դեմոկրատների գրեթէ 2/3-րդի կարծիքով Բայդէնը պէտք է դուրս մնայ նախագահական մրցապայքարից
«ԱԼԻՔ» – Դեմոկրատների գրեթէ 2/3-րդը կարծում է, որ ԱՄՆ նախագահ Ջօ Բայդէնը պէտք է դուրս մնայ նախագահական մրցապայքարից եւ թոյլ տայ, որ իր կուսակցութիւնը այլ թեկնածու առաջադրի, ըստ նոր հարցման՝ կտրուկ հերքելով նրա պնդումը, թէ «միջին վիճակագրական դեմոկրատները» դեռ իր հետ են, անգամ եթէ որոշ «աղմկոտ անուններ» նրանից երես են թեքել: Հաղորդում է Associated Press-ը։
Հանրային կապերի AP-NORC հետազօտութիւնների կենտրոնի անցկացրած նոր հարցումը միաժամանակ ցոյց է տւել, որ 10 դեմոկրատներից միայն 3-ն է չափազանց կամ շատ վստահ, որ Բայդէնը՝ նախագահի պաշտօնում արդիւնաւէտօրէն ծառայելու հմար բաւարար մտաւոր կարողութիւններ ունի:
Անհասկանալի է, թէ արդեօք Թրամփի դէմ մահափորձն ազդե՞լ են Բայդէնի մասին մարդկանց կարծիքի վրայ, սակայն մահափորձից յետոյ անցկացւած մի քանի հարցումներ նրա հեռանկարները բարելաււելու մասին նշաններ ցոյց չեն տւել:
Ընդսմին, երբ ԱՄՆ փոխնախագահ Քամալա Հարիսը լրացուցիչ ուշադրութեան է արժանանում Բայդէնի հրաժարականի մասին խօսակցութիւնների ֆոնին, հարցման արդիւնքում պարզւել է, որ Հարիսի նկատմամբ բարեհաճութեան վարկանիշը համապատասխանում է Բայդէնի վարկանիշին, բայց Հարիսի մասին բացասական կարծիք ունեցող ամերիկացիների մասնաբաժինը փոքր-ինչ ցածր է:
Հարցումը որոշ ապացոյցներ է տալիս, որ սեւամորթ դեմոկրատները Բայդէնի ամենաուժեղ կողմնակիցներից են. հարցւածների մօտ կէսը կարծում է, որ նա պէտք է շարունակի քարոզարշաւը՝ 10 սպիտակամորթ եւ իսպանախօս դեմոկրատներից մօտ 3-ի համեմատ: Ընդհանուր առմամբ, 10 ամերիկացիներից եօթը կարծում է, որ Բայդէնը պէտք է հրաժարւի ընտրութիւններին մասնակցելուց, ընդ որում դեմոկրատները միայն մի փոքր աւելի քիչ են, քան հանրապետականներն ու անկախները, յայտարարում, որ նա պէտք է ճանապարհ բացի նոր թեկնածուի համար: 10 ամերիկացիներից մօտ 6-ը ցանկանում է, որ Դոնալդ Թրամփը հեռանայ նախագահական մրցապայքարից, սակայն հանրապետականներն այս ճամբարում համեմատաբար քիչ են:
Ինչ վերաբերում է Բայդէնին, ապա մինչեւ 45 տարեկան դեմոկրատների 3/4-րդը ցանկանում է, որ Բայդէնը լքի պաշտօնը, ի հակադրութիւն 10 տարեց դեմոկրատներից մօտ 6-ի:
Մեծ է հաւանականութիւնը, որ այս բոլոր վերջին իրադարձութիւնների պատճառով ամերիկացիները համարում են, որ Թրամփն աւելի հաւանական է, որ յաղթի Բայդէնին 2024 թւականի ընտրութիւններում՝ 42%-ն ընդդէմ 18%-ի:
Հարցւածների մօտ ¼-րդը կարծում է, որ երկու թեկնածուները յաղթելու հաւասար շանսեր ունեն:
