Փեզեշքիանը՝ Պաղեստինի «Իսլամական Ջիհադ»-ի ԳՔ-ի հետ հանդիպման ժամանակ. «Իրանի դիրքորոշումը Երուսաղէմի ազատութեան գործին աջակցելու հարցում անփոփոխ է»
«ԱԼԻՔ» – Երէկ՝ յուլիսի 29-ին, Հանրապետութեան նախագահ Մասուդ Փեզեշքիանը հանդիպել է Պաղեստինի «Իսլամական Ջիհադ» կազմակերպութեան գլխաւոր քարտուղար Զիադ Նոխալէի հետ, որը Թեհրան է ժամանել մասնակցելու նախագահի երդմնակալութեան արարողութեանը:
Հանդիպման ընթացքում Փեզեշքիանը յայտնել է, որ Իրանի դիրքորոշումը պաղեստինեան ժողովրդին պաշտպանելու եւ Երուսաղէմի ազատութեան գործին աջակցելու հարցում անփոփոխ է: Նա նշել է, որ այդ դիրքորոշումը փոփոխութեան չի ենթարկւում կառավարութիւնների փոփոխութեամբ:
«Ճնշւած պաղեստինեան ժողովրդի իդէալներին աջակցութիւնը կը շարունակւի նոյն թափով եւ ոչ մի գործօն չի կարող խաթարել մեր կամքն այս ուղղութեամբ»,- յստակեցրել է նախագահը:
Զիադ Նոխալէն էլ իր հերթին երախտագիտութիւն է յայտել Իրանի կառավարութեանն ու ժողովրդին՝ Պաղեստինի ժողովրդին ցուցաբերած անվերապահ աջակցութեան համար՝ նշելով, որ պաղեստինցիները երբեք չեն մոռանալու այս մասին:
