Յակոբ Բագրատունի. «Իսրայէլը Լիբանանի ժողովրդին է թիրախաւորում, իսկ «Հեզբօլլահ»-ը պատասխանում է զինւորական կենտրոններին»

Իսրայէլը Լիբանանի ժողովրդին է թիրախաւորում, իսկ «Հեզբօլլահ»-ը պատասխանում է զինւորական կենտրոններին: Այս մասին News.am-ի հետ զրոյցում ասել է ՀՅԴ Լիբանանի կենտրոնական կոմիտէի ներկայացուցիչ, Լիբանանի խորհրդարանի պատգամաւոր Յակոբ Բագրատունին՝ խօսելով Լիբանանում ստեղծւած իրադրութեան մասին:

«Անկեղծ ասած ամիսներ ի վեր կրկնւող այն հաստատումը, որ լայնածաւալ պատերազմի չեն գնայ, կամ Միացեալ Նահանգներն ու արեւմտեան ուժերը ճնշում պէտք է բանեցնեն Իսրայէլի վրայ, արդէն իսկ գոյութիւն ունեցող, ընդունւած հաւասարակշռութիւնը կը խախտւէր թէ՛ աշխարհագրական իմաստով, թէ՛ գործածւած զինամթերքի իմստով եւ թէ՛ արձանագրւած զոհերի իմաստով: Առաջինը պէտք է արձանագրել, որ Իսրայէլը ուղղակի Լիբանանի ժողովրդին է թիրախաւորում, իսկ «Հեզբօլլահ»-ը ուղղակի պատասխանում է զինւորական կենտրոններին: Փաստօրէն արձանագրւող զոհերի թիւը Իսրայէլում եւ Լիբանանում անհամեմատ  են: Եթէ 2 ամիս առաջ անհաւանական կը թւար ցամաքային ներխուժումը, այսօր Իսրայէլի  կատարածը ցոյց է տալիս, որ հնարաւոր է նաեւ ցամաքային ներխուժումը: Իսրայէլում հասկանում են, որ պարտաւոր են օգտագործել տարածաշրջանային եւ միջազգային դրութիւնը եւ յատկապէս Միացեալ Նահանգներում նախագահական ընտրութիւնները, որպէսզի կարողանան այդ ժամանակի ընթացքում առաւելագոյնը անել թիրախներին եւ նպատակներին հասնելու համար:

Իսրայէլի հիմնական նպատակները երկուսն են. առաջինը՝ ամբողջաապէս չէզոքացնել «Հեզբօլլահ»-ի զինւորական կարողութիւնը, եւ երկրորդ՝ Լիբանանի հարաւային ուղղութեան մէջ ապահովական գօտի ստեղծել, որպէսզի հետագայում որեւէ յարձակման դէմ կանգնի: Փաստօրէն, երբ այսօր (սեպտեմբերի 24-ԽՄԲ.) Իսրայէլի վարչապետը յայտարարում էր, որ իր պատերազմը Լիբանանի եւ Լիբանանի ժողովրդի դէմ չէ, այլ «Հեզբօլլահ»-ի, սա մեզ համար պարզապէս աչքին փոշի սրկսել է եւ երկրորդ, որ լիբանանեան ներքին ճակատում պառակտումներ լինեն, քաղաքական ինչու ոչ նաեւ միջհամայնքային ոչ առողջ մթնոլորտ ստեղծւի, որից կարող է օգտւել միայն Իսրայէլը»,- ասել է նա:

Յակոբ Բագրատունին տեղեկացրել է նաեւ, որ Իսրայէլի յարձակման հետեւանքով լիբանանահայութեան շրջանում զոհեր չկան: