Արա Պօղոսեան. «Հիմա շատ աւելի արդիական է յատկապէս BRICS-ը»
«ԱԼԻՔ» – Միջազգայնագէտ Արա Պօղոսեանը ֆէյսբուքեան իր էջում գրառում է կատարել՝ անդրադառնալով BRICS-ի թեմային:
«Դեռ նախորդ տարի էի գրել BRICS-ի հնարաւոր յաջողութեան մասին, կարծում եմ կայ իմաստ կրկին վերահրապարակելու նոյն գրառումը.
Ակնյայտ է, որ ՀԱՊԿ և ԵԱՏՄ կառոյցները որոշ ժամանակ անց կորցնելու են իրենց արդիականութիւնը եւ դրանց գոյութիւնը ինքնին կը դառնայ անիմաստ։
Հիմա շատ աւելի արդիական է յատկապէս BRICS-ը, Շանհայի համագործակցութեան կազմակերպութիւնը, որոնք հաւակնում են դառնալու նոր բեւեռ թէ՛ ֆինասա-տնտեսական, եւ թէ՛ քաղաքական առումով։
Ընդորում այս կազմակերպութիւնները եթէ յաջողեն, ապա ամբողջովին ընդգրկելու են նաեւ ՀՀ սահմանները (Թուրքիան ձգտում է անդամակցել)։
Ուստի Հայաստանը հիմա ո՛չ թէ պէտք է ռեակտիւ ու զգացական դիւանագիտութեան միջոցով Հայաստանի համար ստեղծի թշնամիների նոր բանակ, այլեւ պէտք է նուրբ եւ պրոակտիւ դիւանագիտութեան միջոցով կարողանայ շահել ստեղծւած իրավիճակում` ե՛ւ Արեւմուտքի հետ զգուշօրէն յարաբերութիւններ զարգացնելով եւ շահելով, ե՛ւ արեւելքի հետ։
Դեռ ոչ ոք չի կարող յստակ ասել, ապագայ աշխարհակարգում կը շահեն բլոկայի՞ն երկրները, թէ՞ ոչ-բլոկային բազմակողմ յարաբերութիւններ զարգացնող երկրները, ուստի այսօր չի կարելի երկիրը տանել ցնցումների ու անկառավարելի մարտահրաւէրների յորձանուտ, որոնք դժւար թէ կարողանանք յաղթահարել»,- գրել է նա:
