«ԱԼԻՔ» – «Իրանը միանշանակ կը պատասխանի Սիոնիստական ռեժիմի ագրեսիային, ճիշտ ժամանակին եւ ճիշտ ձեւով»: Այս մասին լիբանանեան Al Mayadeen հեռուստալիքին տւած հարցազրոյցում յայտարարել է Արտաքին յարաբերութիւնների ռազմավարական խորհրդի ղեկավար Քամալ Խառազին:
Հարցազրոյցի ընթացքում, տարածաշրջանային իրադարձութիւնների եւ զարգացումների համատեքստում, Խառազին ներկայացրել է Իրանի Իսլամական Հանրապետութեան քաղաքականութիւնն ու մօտեցումները:
Նա կրկին ընդգծել է, որ Իրանը պատերազմի չի ձգտում, սակայն պատրաստ է հնարաւոր բոլոր սցենարների համար. «Մենք պատրաստ ենք պատերազմի: Իհարկէ, մենք չենք ցանկանում, որ պատերազմը տարածւի ողջ տարածաշրջանում։ Իսրայէլի վրայ մեր յարձակումներով, մենք ապացուցել ենք զսպելու մեր կարողութիւնը։ Ուստի, եթէ Իսրայէլը ցանկանայ շարունակել իր ագրեսիան, բնականաբար մենք էլ կը պատասխանենք»:
Հարցազրոյցի ընթացքում, լրագրողը յիշեցրել է, որ Խառազին առաջինն էր, որ յայտարարեց այն մասին, որ եթէ Իրանի Իսլամական Հանրապետութեանը սպառնան կամ յարձակւեն նրա վրայ, ապա պաշտօնական Թեհրանը կարող է վերանայել իր միջուկային դոկտրինան. «Ի՞նչ նկատի ունէիք, երբ յայտարարեցիք Իրանի միջուկային դոկտրինայի վերանայման հնարաւորութեան մասին»:
«Դա յստակ է: Եթէ Իրանի Իսլամական Հանրապետութիւնը կանգնի գոյութենական բնոյթի սպառնալիքի առջեւ, ապա մենք անխուսափելիօրէն փոխելու ենք մեր ռազմական դոկտրինան: Մենք այժմ ունենք միջուկային զէնք արտադրելու համար անհրաժեշտ կարողութիւն, եւ միակ արգելքը նման զէնքի արտադրութիւնն արգելող Իսլ. յեղափոխութեան առաջնորդի ֆեթւան է: Հրթիռային կարողութիւնների առումով, բոլորն ընդունում են մեր հրթիռային հզօրութիւնը: «Ճշմարիտ խոստում» գործողութիւնն այդ հզօրութեան ապացոյցն էր: Հրթիռների հեռահարութեան առումով, մենք անցեալում հաշւի ենք առել Արեւմուտքի, յատկապէս եւրոպացիների զգայնութիւնները, բայց երբ նրանք հաշւի չեն առնում մեր զգայնութիւնները, յատկապէս Իրանի Իսլամական Հանրապետութեան տարածքային ամբողջականութեան հարցում, ոչ մի պատճառ չկայ, որ մենք հաշւի առնենք նրանց զգայնութիւնները: Ուստի, հնարաւոր է, որ Իրանը մեծացնի իր հրթիռների հեռահարութիւնը»,- ասել է Խառազին:
Պատասխանելով Արեւմուտքի հետ յարաբերութիւնների, մասնաւորապէս ԱՄՆ-ի հետ անուղղակի բանակցութիւնների եւ Միջուկային համաձայնագրին վերադառնալու հնարաւորութեան մասին հարցին, Արտաքին յարաբերութիւնների ռազմավարական խորհրդի ղեկավարը յստակեցրել է. «Մենք հաւատարիմ ենք մեր նախկին պայմանաւորւածութիւններին, պայմանով, որ միւս կողմերը նոյնպէս հաւատարիմ մնան դրանց։ Ցաւօք, նրանք հաւատարիմ չեն, եւ բանակցելու փոխարէն շարունակում են պատժամիջոցներ կիրառել Իրանի Իսլամական Հանրապետութեան դէմ»:
Այս համատեքստում մեր երկրի նախկին ԱԳ նախարարն անդրադարձել է նաեւ Չինաստանի եւ Ռուսաստանի հետ Իրանի ռազմավարական բնոյթի յարաբերութիւններին. «Ռուսաստանը եւ Չինաստանը փորձում են ձեւաւորել նոր աշխարհակարգ, որպէսզի աշխարհը թօթափի Արեւմուտքի գերիշխանութիւնը, մենք նրանց հետ ընդհանուր բաներ ունենք: Մենք կարծում ենք, որ նոր ծնւող տէրութիւնները, այդ թւում՝ Իրանը, պէտք է կարեւոր դեր խաղան նոր աշխարհակարգում, որպէսզի աշխարհը կառավարւի աւելի ժողովրդավարական ճանապարհով, այլ, ոչ թէ ֆինանսապէս եւ քաղաքականապէս գտնւի Արեւմուտքի գերիշխանութեան ներքոյ: Այս նպատակին են ուղղւած այն նախաձեռնութիւնները, որոնք կիրառւել են Շանհայի կազմակերպութեան, BRICS-ի եւ New Development Bank-ի շրջանակում: Այդ կազմակերպութիւններին անդամակցում է նաեւ Իրանը, եւ փորձում է շարժւել նոր աշխարհակարգ ստեղծելու ուղղութեամբ»:
