Նեթանիահուն Եօաւ Գալանտին ազատել է պաշտպանութեան նախարարի պաշտօնից
«ԱԼԻՔ» – Իսրայէլի վարչապետ Բենիամին Նեթանիահուն, վկայակոչելով փոխվստահութեան բացակայութիւնը, պաշտօնանկ է արել պաշտպանութեան նախարար Եօաւ Գալանտին:
Իր գրասենեակի հրապարակած հակիրճ նամակում Նեթանիահուն Գալանտին յայտնել է. «Ձեր պաշտօնավարման ժամկէտը կը լրանայ այս նամակը ստանալուց 48 ժամ անց»:
Ըստ իսրայէլական լրատւամիջոցների՝ Գալանտին կը փոխարինի արտգործնախարար Իսրայէլ Կացը, իսկ արտգործնախարարի պաշտօնում Կացին կը փոխարինի առանց պորտֆելի նախարար Գեդէոն Սաարը։
«Ցաւօք սրտի, թէեւ պատերազմի առաջին ամիսներին վստահութիւն կար իմ եւ պաշտպանութեան նախարարի միջեւ եւ շատ արդիւնաւէտ աշխատանք էր տարւում, վերջին ամիսներին այդ վստահութիւնը ճեղքւեց»,- ասել է Նեթանիահուն տեսաուղերձում։ Ըստ նրա՝ իրենք տարաձայնութիւններ են ունեցել պատերազմի վարման հարցում, եւ Գալանտը որոշումներ է ընդունել եւ յայտարարութիւններ արել, որոնք հակասում են կառավարութեան որոշումներին։
Նեթանիահուն միաժամանակ Գալանտին մեղադրել է Իսրայէլի թշնամիներին անուղղակիօրէն օգնելու մէջ։
