Նեթանիահուն յոյս ունի վերականգնել Թրամփի հետ սերտ համագործակցութիւնը

«ԱԼԻՔ» – Իսրայէլի վարչապետ Բենիամին Նեթանիահուն կը ձգտի վերականգնել սերտ համագործակցութիւնը ԱՄՆ նախագահական ընտրութիւններում յաղթած հանրապետական ​​Դոնալդ Թրամփի հետ՝ Իրանի հետ առճակատման հարցում նրա աջակցութիւնը ստանալու համար։ Այս կարծիքն արտայայտւած է Politico եւրոպական հրատարակութեան հրապարակած նիւթում։

Նրա գնահատականներով՝ Նեթանիահուն յոյսը դնում է Թրամփի վրայ՝ աջակցելու «Մերձաւոր Արեւելքը վերափոխելու» իր ռազմավարութեանը, «որում տեղ չկայ Իրանի ղեկավարութեան համար», պաղեստինեան արմատական ​​ՀԱՄԱՍ շարժման եւ լիբանանեան շիական «Հեզբօլլահ» կազմակերպութեան։ Պարբերականը նշում է, որ այս առումով Իսրայէլի վարչապետը, ամենայն հաւանականութեամբ, կը յենւի այն փաստի վրայ, որ Թրամփը, 2016-2020 թւականներին իր առաջին նախագահական ժամկէտում, «Իրանի վրայ մաքսիմալ ճնշման ռազմավարութեան կողմնակիցն էր»։

Նեթանիահուի նախընտրական շտաբի նախկին ստրատեգ Նադաւ Շտրաուչլերի կարծիքով՝ հրեայ վարչապետը «պէտք է ականջից ականջ ժպտալով ողջունէր Թրամփի յաղթանակի լուրը»։ «Այժմ [Նեթանիահուն] ընկեր ունի Սպիտակ տանը, դա շատ բան է նշանակում եւ կարող է շատ բան փոխել»,- Politico-ին ասել է Ստրաուխլերը: Նա կարծում է, որ այս համատեքստում Իսրայէլի վարչապետն առաջին հերթին «մտածում է Իրանի մասին»։

Հրատարակութիւնը յիշեցնում է, որ Նեթանիահուն արդէն Թրամփի յաղթանակն անւանել է «պատմութեան մէջ ամենամեծ վերադարձը»։ Ըստ Politico-ի, նման արձագանգը մասամբ «նպատակւած էր փոխհատուցել Նեթանիահուի ձախողումը 2020 թւականի նոյեմբերին», երբ նա առաջին օտարերկրեայ առաջնորդն էր, ով շնորհաւորեց ԱՄՆ նորընտիր նախագահ Ջօ Բայդէնին յաղթանակի կապակցութեամբ: Սակայն, ինչպէս ասել է Շտրաուխլերը, այդ ժամանակւանից Իսրայէլի վարչապետը «ջանքեր է գործադրել վերականգնելու երերուն համագործակցութիւնը» Թրամփի հետ։ Մասնաւորապէս, Թրամփը անցեալ ամիս նշել էր, որ Նեթանիահուն «գրեթէ ամէն օր» զանգահարել է իրեն՝ «որոշ հարցերի վերաբերեալ իր կարծիքը» ստանալու համար։

Այս առնչութեամբ Politico-ն նշում է, որ ԱՄՆ-ի նախագահութիւնից Բայդէնի հեռանալով, Նեթանիահուն աւելի քիչ կը սահմանափակւի իր գործողութիւններում։ «Թրամփը միշտ մտածում է գործարքի սկզբունքի վրայ, առաջին տեղում իր շահերն են, նա շատ անկանխատեսելի է։ Սակայն, նրանց [Նեթանիահուի] մտածելակերպը եւ բնազդները շատ աւելի մեծ չափով են համընկնում, քան Նեթանիահուի եւ Բայդէնի մտածելակերպը»,- ասել է հրատարակութեան աղբիւրը Իսրայէլի բարձրաստիճան պաշտօնեաներից: