Ռուբէն Մելիքեան. «Նեռին ծառայող բոլոր կամակատարները հաւասար են, բայց ոմանք «աւելի հաւասար» են»
«ԱԼԻՔ» – Իշխանական համակարգում տեղի ունեցած հրաժարականների ֆոնին, փաստաբան Ռուբէն Մելիքեանը ֆէյսբուքեան իր էջում անդրադարձել է յատկապէս Բարձրագոյն դատական խորհրդի արդէն նախկին նախագահ Կարէն Անդրէասեանի հրաժարականին, եւ նրա աւերիչ գործունէութեանը ԲԴԽ նախագահի պաշտօնում:
Այս համատեքստում նա յիշել է Ջորջ Օրւէլի անմահական ստեղծագործութեան՝ «Անասնաֆերմա»-ի յայտնի թեւաւոր խօսքը. «Բոլոր չորքոտանիները հաւասար են, իսկ երկոտանիները՝ աւելի հաւասար»:
«Նեռին ծառայող բոլոր կամակատարները հաւասար են, բայց ոմանք «աւելի հաւասար» են, զօրօրինակ՝ Կարէն Անդրէասեանը։ Նա ոչ միայն կարիերիզմի ու անսկզբունքայնութեան գրոսմայստեր է, այլեւ՝ դեմագոգիայի գծով օլիմպիական չեմպիոն։
Թէ բա՝ «ստիպւած եմ եղել դիմել վիրահատական միջամտութիւնների»…
Ի՞նչ է «վիրահատական միջամտութիւնը». չարիքը կոշտ ձեւով հեռացնելու գործողութիւն։ Իսկ դու ի՞նչ ես արել։ Հեռացրել ես լաւագոյններին, իսկ վատագոյններին չես կպել։
Անուննե՞ր. դատաւոր Զարուհի Նախշքարեան, դատաւոր Դաւիթ Յարութիւնեան, դատաւոր Արշակ Վարդանեան, եւ այլն, եւ այլն, եւ այլն։
Կարճ ասած՝ սա այն քիչ դէպքերից է, որ ուղղակի չեմ պատկերացնում՝ ում պիտի բերեն, որ աւելի վատ լինի»,- գրել է Մելիքեանը:
