Իրաւանի. «ՄԱԿ-ը եւ ԱԽ-ն պէտք է յստակօրէն դատապարտեն Սիրիայում Իրանի դիւանագիտական ներկայացուցչութիւնների վրայ յարձակումները»
«ԱԼԻՔ» – Սիրիայում Իրանի Իսլամական Հանրապետութեան դիւանագիտական եւ հիւպատոսական օբիեկտների վրայ զինւած խմբաւորումների յարձակումից յետոյ, ՄԱԿ-ում Իրանի մշտական ներկայացուցիչ Ամիր Սայիդ Իրաւանին նամակով դիմել է ՄԱԿ-ի գլխաւոր քարտուղարին եւ Անվտանգութեան խորհրդին՝ պահանջելով յստակօրէն դատապարտել այդ յարձակումները եւ անհրաժեշտ միջոցներ ձեռնարկել՝ ապահովելու Սիրիայում Իրանի դիւանագիտական անձնակազմի եւ օբիեկտների անվտանգութիւնն ու կանխելու նման յարձակումների կրկնութիւնը:
«Այս գործողութիւնները բացայայտ խախտում են Դիւանագիտական յարաբերութիւնների մասին Վիեննայի կոնւենցիան (1961թ.) եւ Հիւպատոսական յարաբերութիւնների մասին Վիեննայի կոնւենցիան (1963թ.), որոնք երաշխաւորում են դիւանագիտական հաստատութիւնների անձեռնմխելիութիւնը եւ դրանց աշխատակիցների անվտանգութիւնը։
Իրանի Իսլամական Հանրապետութիւնն ընդգծում է, որ դիւանագիտական եւ հիւպատոսական ներկայացուցչութիւնների եւ նրանց անձնակազմի անձեռնմխելիութիւնը աներկաբօրէն պէտք է յարգւի միջազգային իրաւունքի համաձայն: Ոչ մի անձ, խումբ կամ կառավարութիւն իրաւունք չունի նման խախտումներ թոյլ տալ կամ օժանդակելու դրանց:
Իրանի Իսլամական Հանրապետութիւնը ՄԱԿ-ի գլխաւոր քարտուղարին եւ Անվտանգութեան խորհրդին կոչ է անում յստակօրէն դատապարտել այդ յարձակումները եւ անհրաժեշտ միջոցներ ձեռնարկել՝ ապահովելու Սիրիայում Իրանի դիւանագիտական անձնակազմի եւ օբիեկտների անվտանգութիւնն ու կանխելու նման յարձակումների կրկնութիւնը»,- ասւած է ՄԱԿ-ում Իրանի մշտական ներկայացուցչի նամակում:
