Գառնիկ Դանիէլեան. «Արցախցիների վերադարձի մասին խօսում են բոլորը, բացի ՀՀ-ից»
«ԱԼԻՔ» – «Արցախի հարցը փակւած չէ, ցեղասպանութիւն է տեղի ունեցել եւ դրա արդիւնքում հայրենազրկւել են 150 հազար մեր քոյրերը եւ եղբայրները, եւ մեր պարտքն է, որպէսզի ամէն օր աշխատենք այդ ուղղութեամբ»: Այս մասին երէկ՝ դեկտեմբերի 10-ին, Արցախի ներկայացուցչութեան դիմաց լրագրողների հետ զրոյցում ասել է ՀՅԴ անդամ, ԱԺ «Հայաստան» խմբակցութեան պատգամաւոր Գառնիկ Դանիէլեանը:
«Միջազգային հանրութեան տարբեր դերակատարներ էլ դրա մասին բազմաթիւ յայտարարութիւններ են արել, եւ մենք պէտք է ամէն ինչ անենք, որպէսզի Արցախը, արցախահայ մեր քոյր-եղբայրների վերադարձի իրաւունքը դառնայ օրակարգի մի մաս եւ այդ ուղղութեամբ բազմաթիւ աշխատանքներ կան անելու: Ցաւօք սրտի միակ երկիրը Հայաստանի Հանրապետութիւնն է, որը այդ ուղղութեամբ որեւէ քայլ չի ձեռնարկում։ Ամբողջ ողբերգութիւնը կայանում է նրանում, որ դրա մասին խօսում են շատ երկրներ, բացի Հայաստանի Հանրապետութեան կառավարութիւնից եւ իշխանութիւններից»,- ասել է պատգամաւորը:
Հարցին՝ երբ են պատրաստւում Արցախի մասով յայտարարութիւններն ուղղել միջազգային հանրութեանը, Դանիէլեանը պատասխանել է.
«Շուտով, այդ յայտարարութիւններն արդէն քիչ յետոյ նաեւ լրատւամիջոցներին հասանելի կը լինեն, եւ դուք կը տեսնէք, որ շատ կարեւոր յայտարարութիւններ է հնչել, եւ այդ ուղղութեամբ մենք պատրաստւում ենք աշխատանքները իրականացնել»:
