Արցախի Հանրապետութեան անկախութեան հանրաքւէի 33-րդ եւ Սահմանադրութեան ընդունման 18-րդ ամեակների առթիւ
ՍՏԵՓԱՆ ՀԱՍԱՆ–ՋԱԼԱԼԵԱՆ
Քաղաքագէտ
33 տարիներ առաջ ճիշտ այս օրը՝ 1991 թ. դեկտեմբերի 10-ին, միջազգային դիտորդների ներկայութեամբ Արցախի Հանրապետութիւնում անցկացւել է հանրաքւէ արդէն հռչակւած Արցախի Հանրապետութեան անկախութեան հարցով, որին մասնակցել է քւէարկելու իրաւունք ունեցող քաղաքացիների 82.2%-ը: Արցախի Հանրապետութեան անկախութեանը կողմ է արտայայտւել քւէարկութեան մասնակիցների 99.89%-ը:
Անցեալ աւելի քան 30 տարիների ընթացքում արցախահայութիւնը, մայր Հայաստանի զօրակցութեամբ եւ օժանդակութեամբ, զարգացնելով Արցախի դարաւոր պետականութեան հարուստ աւանդոյթները, կառուցել է աշխարհի բազմաթիւ երկրների համար շատ առումներով օրինակելի պետութիւն՝ Արցախի Հանրապետութիւնը:
Ոչ ոք չէր մտածում, որ Հայաստանի Հանրապետութեան որեւէ ղեկավար Արցախի Հանրապետութիւնը կարող է ճանաչել Ադրբեջան անունով բռնապետական, արհեստական, կեղծ կազմաւորման մաս:
Ի դժբախտութիւն եւ ի ամօթ բոլորիս՝ մենք նշւածի փաստի ականատեսներն ու ժամանակակիցներն ենք:
Ոչ ոք, ու ոչինչ երբեք չի կարող հիմնաւորել, կամ արդարացնել Արցախի Հանրապետութեան դեօկուպացիայի չիրականացումն ու մեր հայրենակիցների՝ տիրոջ իրաւունքով եւ կարգավիճակով Արցախ չվերադառնալը:
Մենք անպայմանօրէն պիտի վերադարձնենք Արցախը: Այլ տարբերակ չի կարող եւ չպէտք է լինի:
Մենք պէտք է մաքրենք ամօթի խարանը մեր ճակատներից:
18 տարիներ առաջ այս օրը՝ 2006 թ. դեկտեմբերի 10-ին, արցախահայութիւնը համաժողովրդական հանրաքւէով ընդունել է նաեւ մայր օրէնք՝ Արցախի Հանրապետութեան Սահմանադրութիւնը: Հարկ է նշել, որ դեռեւս աւելի քան 1500 տարիներ առաջ հայոց մէջ առաջինը, իսկ աշխարհում առաջիններից մէկը Սահմանադրութիւն ընդունւել է հէնց Արցախում: 488 թ. մայիսի 1-ին Արցախի թագաւոր Վաչագան Բարեպաշտի գլխաւորութեամբ հրաւիրւած բազմաբիւր ատեանը՝ կազմւած Արցախի աշխարհիկ եւ հոգեւոր առաջնորդներից, ընդունել է Արցախի մայր փաստաթուղթը, որը կոչւել է «Սահմանադրութիւն կանոնական»:
Այս իմաստով, կարող ենք վստահաբար պնդել, որ Արցախում սահմանադրաիրաւական մշակոյթն ունի աւելի քան մէկուկէս հազարամեակի պատմութիւն:
Սիրելի՛ արցախցիներ, որքան էլ վիճակն օրհասական լինի, չընկճւէ՛ք, գօտէպնդւէ՛ք, թող երբեք չլքի ձեզ սէրն առ ՀԱՅՐԵՆԻՔ, քանզի փորձութիւններն անցողիկ են, իսկ ՀԱՅՐԵՆԻՔՆ՝ առյաւէտ:
Յաւերժ փառք Արցախի Հանրապետութեան անկախութեան համար իրենց կեանքը զոհաբերած բոլոր հայորդիներին:
