Իսրայէլի եւ «Հեզբօլլահ»-ի միջեւ հրադադարն ընդհանուր առմամբ պահպանւում է, Լիբանանում կեանքը բնականոն հուն է վերադառնում
Իսրայէլի եւ «Հեզբօլլահ»-ի միջեւ հրադադարն ընդհանուր առմամբ պահպանւում է, իսկ հասարակութեան կեանքը բնականոն հուն է վերադառնում՝ չնայած այն հանգամանքին, որ նախորդ շաբաթների ընթացքում Իսրայէլը բազմիցս խախտել է ձեռք բերւած համաձայնութիւնը։
«Արմէնպրես»-ի թղթակցի հետ զրոյցում այս մասին յայտնեց Բէյրութում լոյս տեսնող «Ազդակ» թերթի գլխաւոր խմբագիր, միջազգայնագէտ Շահան Գանտահարեանն՝ անդրադառնալով Իսրայէլի եւ «Հեզբօլլահ» խմբաւորման միջեւ դեռեւս նոյեմբերի 27-ին ուժի մէջ մտած հրադադարի պահպանմանը, ինչպէս նաեւ Լիբանան-Իսրայէլ սահմանին տիրող իրավիճակին։
«Հրադադարն, ընդհանուր առմամբ, պահպանւում է՝ չնայած այն հանգամանքին, որ նախորդ շաբաթների ընթացքում Իսրայէլը բազմիցս խախտել է այն»,-յայտնեց զրուցակիցը։
Նա յիշեցրեց, որ, այդուհանդերձ, չպէտք է մոռանալ, որ կողմերի միջեւ դեռեւս նոյեմբերին ձեռք բերւած հրադադարի համաձայնագրում կայ կէտ, որի համաձայն՝ եթէ կողմերը նկատեն ռազմական տեղաշարժ կամ գործողութեան որեւէ նախապատրաստութիւն, ապա իրաւունք ունեն նաեւ ինքնապաշտպանական գործողութիւններ իրականացնել, ինչը եղել է նաեւ Իսրայէլի պահանջը։
«Դրանով Իսրայէլը թույլտւութիւն էր ստանում ցանկացած պահի նաեւ ռազմական գործողութիւն իրականացնելու Լիբանանում, բայց, մեծ հաշւով, հրադադարը պահպանւում է, ինչը նաեւ կեանքը դէպի բնականոն հուն է տանում»,-նշեց Շահան Գանտահարեանը։
Անդրադառնալով Լիբանանում տիրող քաղաքական իրադրութեանը՝ միջազգայնագէտը նշեց, որ կայ որոշում, որ 2025 թւականի յունւարի 9-ին տեղի է ունենալու խորհրդարանի նիստ՝ երկրի նախագահի ընտրութեան օրակարգով։
«Խորհրդարանի նախագահը մի քանի անգամ հաստատել է, որ նիստը կայանալու է, եւ այդ օրն անպայմանօրէն Հանրապետութեան նախագահը կընտրւի, ինչը, ենթադրւում է, կը յանգեցնի հանգուցալուծումների։ Դրանից յետոյ կը լինի վարչապետի նշանակում, կառավարութեան նշանակում»,- նշեց Գանտահարեանը՝ յոյս յայտնելով, որ այդ նիստի կայացմանը ոչինչ չի խանգարի։
Շահան Գանտահարեանն, անդրադառնալով իսրայէլական զինւած ուժերի՝ Լիբանանի տարածքից դուրս գալու մասին հարցին, յիշեցրեց, որ հրադադարի համաձայնագրի համաձայն՝ իսրայէլական ուժերը դեռ 2 ամիս կարող են տեղակայւած մնալ Լիբանանի հարաւային տարածքներում, որոնք յետոյ փոխարինւելու են լիբանանեան կանոնաւոր զօրքերով։
«Դեռեւս պարզ չէ՝ այդ զօրքերը յետ քաշւում են, թէ ոչ, որովհետեւ Իսրայէլը զգուշացրել էր, որ շուրջ 10 գիւղի բնակիչներ դեռեւս չվերադառնան իրենց տներ։ Չնայած այն հանգամանքին, որ համաձայնութեան մէջ կայ կէտ, որի համաձայն՝ երբ լիբանանեան բանակը տեղակայւի այդ դիրքերում, Իսրայէլն իր ուժերը պէտք է յետ քաշի Լիբանանի տարածքից, այդուհանդերձ, գետնի վրայ դեռեւս պարզ չէ, եւ չի կարելի միանշանակ հաստատել, որ նման տեղաշարժեր տեղի են ունենում»,-եզրափակեց Շահան Գանտահարեանը։
Իսրայէլի եւ լիբանանեան «Հեզբօլլահ» խմբաւորման միջեւ հրադադարն ուժի մէջ է մտել նոյեմբերի 27-ին։ ԱՄՆ նախագահ Ջօ Բայդէնը տեսաուղերձում յայտարարել էր, որ երկու կողմերն էլ ընդունել են ԱՄՆ-ի եւ Ֆրանսիայի միջնորդութեամբ ձեռք բերւած համաձայնագիրը:
