Տիգրան Աբրահամեան. «Հայաստանի իշխանութիւնը գնաց 3-րդ զիջմանը»
«ԱԼԻՔ» – Հայաստանի իշխանութիւնը գնաց 3-րդ զիջմանը․ սահմանազատումը Տաւուշից սկսելը Բաքւի համար կենսական նշանակութիւն ունի։ Այս մասին ֆէյսբուքի իր էջում գրել է ԱԺ «Պատիւ ունեմ» խմբակցութեան քարտուղար Տիգրան Աբրահամեանը։
«Ալիեւի սպառնալից յայտարարութիւնից յետոյ Հայաստանի իշխանութիւնը գնաց 3-րդ զիջմանը: Այս մասին տեղեկացրել է Yerevan.today-ը:
ԵԱՀԿ Մինսկի խմբի լուծարման եւ ՀՀ Սահմանադրութեան փոփոխութիւնն առաւել կարճ ժամկէտում իրականացնելու հաւաստիացումից յետոյ, փաշինեանական իշխանութիւնը տեղի տւեց նաեւ սահմանազատման հարցում:
Հայաստանի համար նպաստաւոր եւ իրադրային առումով տրամաբանական մօտեցումն էր` սահմանազատումը սկսել 2021-23 թւականների ժամանակահատւածում Ադրբեջանի կողմից օկուպացւած հատւածներում, իսկ Ադրբեջանը պնդում էր Տաւուշի ուղղութիւնը, ինչի մասով հանգուցալուծման հասաւ:
Տաւուշից սկսելը Բաքւի համար կենսական նշանակութիւն ունի, որովհետեւ ՀՀ իշխանութիւնն աւելի վաղ ադրբեջանական էր հռչակել, այսպէս կոչւած, անկլաւային գիւղերը` Վերին Ոսկեպարը, Սոֆուլու ու Բարխուդարլու գիւղերը, իսկ դրանց յանձնումը ոչնչացնելու է Տաւուշի մարզի ոչ միայն ներքին կոմունիկացիաները, այլ հարւածի տակ է դնելու Տաւուշով դէպի Բագրատաշէն` հայ-վրացական սահման գնացող մայրուղին եւ Վրաստանից ՀՀ մտնող գազատարը:
Մէկ այլ լուրջ խնդիր է դառնալու Իջեւանից դէպի Բերդ գնացող ճանապարհը, որի մի հատւածը կը յայտնւի Ադրբեջանի վերահսկողութեան տակ:
Յամենայնդէպս, այս պահի դրութեամբ, դրանց փոխանակման կամ այլ լուծման վերաբերեալ որեւէ քաղաքական որոշում չկայ:
Նաեւ ուզում եմ յիշեցնել, որ ըստ ՀՀ-ի ու Ադրբեջանի մինչեւ ստորագրւած եւ վաւերացւած կանոնադրութեան, եթէ օրինակ, Ադրբեջանը Տաւուշի մարզի բռնի սահմանազատումից յետոյ, ինչ-որ յօրինւած պատճառաբանութեամբ տապալի բանակցութիւնները եւ սահմսնազատումը չշարուրակւի, ապա համաձայնեցւած/սահմանազատւած հարւածների կարգավիճակը կամ արւած փոփոխութիւնները նախկին կէտին վերադարձնելու հնարաւորութիւն այլեւս չի լինի»,- գրել է նա:
