ՌԴ ԱԳՆ-ն տարակուսանք է արտայայտել ադրբեջանական ԶԼՄ-ներում մի շարք հակառուսական հրապարակումների վերաբերեալ
«ԱԼԻՔ» – Ռուսաստանը տարակուսանք է յայտնել ադրբեջանական լրատւամիջոցներում հակառուսական հրապարակումների առնչութեամբ: Ինչպէս հաղորդում են ռուսաստանեան ԶԼՄ-ները՝ ՌԴ ԱԳ նախարարի տեղակալ Միխայիլ Գալուզինը Ռուսաստանում Ադրբեջանի արտակարգ եւ լիազօր դեսպան Ռահման Մուստաֆաեւին հրաւիրել է արտգործնախարարութիւն։
Տարակուսանք է արտայայտւել ադրբեջանական ԶԼՄ-ներում մի շարք հակառուսական հրապարակումների, ինչպէս նաեւ Բաքւում «Ռուսական տան» դէմ ապատեղեկատւական արշաւի առնչութեամբ: Նշւել է առաջադրւած մեղադրանքների բացարձակ անհիմնութիւնը։
Բաքուն արձագանգել է
Աւելի ուշ, յայտնի է դարձել, որ պաշտօնական Բաքուն դիմել է հակադարձ քայլի: Ըստ ադրբեջանական ԶԼՄ-ների՝ Բաքւում Ռուսաստանի դեսպան Միխայիլ Եւդոկիմովը հրաւիրւել է Ադրբեջանի ԱԳՆ։
«Հանդիպման ընթացքում նշւել է, որ ռուսական մամուլում Ադրբեջանի վերաբերեալ, այդ թւում՝ Ռուսաստանի պաշտօնական որոշ շրջանակներից, ապատեղեկատւական հաղորդագրութիւնների եւ նիւթերի հրապարակումը թիւրիմացութիւն է առաջացրել, ինչը հակասում է Ադրբեջանի եւ Ռուսաստանի միջեւ դաշնակցային համագործակցութեան մասին հռչակագրի բովանդակութեանը եւ ոգուն։
Ինչ վերաբերում է «Ռուսական տան» մասին տեղական մամուլում տեղ գտած տեղեկատւութեանը, ապա ընդգծւել է, որ դա պաշտօնական դիրքորոշում չէ, որ Ադրբեջանի տարածքում նման կազմակերպութիւնների գործունէութիւնը հիմնւած է փոխադարձութեան սկզբունքի վրայ եւ պէտք է իրականացւի օրէնքի պահանջներին համապատասխան»,- նշւած է Ադրբեջանի ԱԳՆ տարածած պաշտօնական հաղորդագրութիւնում։
Յիշեցնենք, որ ռուս-ադրբեջանական յարաբերութիւնները լարւել են Ակտաուում ադրբեջանական աւիաուղիների ինքնաթիռի կործանումից յետոյ։
